კულტურის სამინისტროს განცხადებით, ინფორმაცია იმაზე, რომ მაქსიმ გალკინსა და ანდრეი მაკარევიჩს უწყების მიერ უარი ეთქვათ თბილისში, ძველ სპორტის სასახლეში დაგეგმილი კონცერტების გამართვაზე, არასწორია.

რატომ არის მნიშვნელოვანი: Biletebi.ge წერს, რომ მაკარევიჩისა და გალკინის კონცერტი პოლიტიკური კონტექსტით გაუქმდა. მათ ოფიციალურ Facebook-გვერდზე კულტურის სამინისტროს ღია წერილით მიმართეს.

• Biletebi.ge აღნიშნავს, რომ 3 კონცერტის ორგანიზატორს დარბაზის მიერ უარი ეთქვა, რისი ფორმალური მიზეზიც სარემონტო სამუშაოებია. თუმცა მათი თქმით, რეალურად ეს პოლიტიკური კონტექსტის გამო მოხდა.

დეტალები: კულტურის სამინისტრო ამბობს, რომ საქმე ყალბი ინფორმაციის გავრცელებას ეხება, რადგან ძველი სპორტის სასახლე უწყების მმართველობაში მოქმედი ორგანიზაცია არაა, შესაბამისად კონცერტის ჩატარების საკითხი სამინისტროს კომპეტენციას სცილდება.

• მათივე თქმით, ახალი სპორტის სასახლე სამინისტროს მიერ არის აშენებული, მისი მმართველობის ქვეშაა და ამჟამად ევრობასკეტს მასპინძლობს, კონცერტის ორგანიზატორებს კი ახალი სპორტის სასახლისთვის არ მიუმართავთ.
• "ფუჭია ყოველგვარი მცდელობა კულტურის სამინისტროს გარშემო სკანდალის მოწყობისა და მოცემული სათუთი თემით მანიპულირების მიზნით", — აღნიშნულია უწყების განცხადებაში.

Biletebi.ge აცხადებს, რომ 3 კონცერტის ორგანიზატორს დარბაზის მიერ უარი ეთქვა, რისი ფორმალური მიზეზიც სარემონტო სამუშაოებია. თუმცა მათი თქმით, რეალურად ეს პოლიტიკური კონტექსტის გამო მოხდა.

• "აკრძალეს არტისტები (მაკარევიჩი, გალკინი), რომლებიც ღიად უჭერენ მხარს უკრაინას და რომელთაც მხარს უჭერენ უკრაინელები. გადახედეთ კომენტარებს არტისტების მომართვებზე";
• "თუმცა მოტივაცია მაინც ბოლომდე გაუგებარია. თუ გვეშინია კერძო კომპანიის მიერ რუსეთის ოპოზიციური არტისტების შემოშვება, რათა რუსეთში ვინმე არ გაღიზიანდეს, რა იქნება შემდეგი ნაბიჯი? ფეისბუქსაც ავკრძალავთ?".

რას ამბობენ სპორტის სასახლეში: როგორც სასახლის ხელმძღვანელმა On.ge-ის განუცხადა, ფიქრობდნენ, რომ სარემონტო სამუშაოებთან დაკავშირებული პრობლემა აღმოიფხვრებოდა და მოასწრებდნენ, თუმცა ის "კიდევ უფრო დამძიმდა".

• "Biletebi.ge-თან არანაირი შეხება არა გვაქვს, ეს ალბათ ორგანიზატორებმა დაუკვეთეს ბილეთების გაყიდვა, საერთოდ რის საფუძველზე აკეთებს [ამ განცხადებას]";
• "სამწუხაროდ, პრობლემა ჩვენ გვქონდა, უნდა აღმოგვეფხვრა ეს პრობლემა და გამძაფრდა — კონდიცირება, ვენტილაცია და ამდენი ხალხისთვის ეს ნამდვილად უსაფრთხოების კუთხით. ჩვენი მხრიდან, სპორტის სასახლის მხრიდან ასეთ პასუხს მოგცემდით", — განაცხადა მან.