ჟურნალისტმა ირაკლი ღარიბაშვილს სალომე ზურაბიშვილის განცხადება გაუმეორა, სადაც პრეზიდენტი პრემიერს მოუწოდებს, რომ ქართული ოცნებიდან წასულ ოთხეულ გაემიჯნოს.

დეტალები: ღარიბაშვილი აცხადებს, რომ ყოფილი თანაგუნდელების კრიტიკაც და პოლემიკაც მოისმინა. მისი თქმით, "ამ პოლემიკის შემდგომი განვრცობა და მისი გადაჭარბება არ შედის ჩვენი ქვეყნის ინტერესებში".

  • "მხოლოდ კრიტიკა და ამ კრიტიკული კითხვების დასმა, მე ვფიქრობ, არ არის საკმარისი და არ არ არის საჭირო. აშშ-ს, მას შემდეგ, რაც ჩვენ აღვადგინეთ დამოუკიდებლობა, ძალიან ბევრი პოზიტიური პროექტი აქვს განხორციელებული, ძალიან ბევრი დახმარება აქვს გაწეული ჩვენი ქვეყნისთვის არაერთი მიმართულებით", — თქვა ღარიბაშვილმა.

რატომ არის მნიშვნელოვანი: პარტიიდან წასვლის შემდეგ მიხეილ ყაველაშვილი, სოზარ სუბარი, დიმიტრი ხუნდაძე და გურამ მაჭარაშვილი ანტიდასავლურ ნარატივებს აჟღერებენ. ისინი უკვე არაერთხელ დაესხნენ თავს ამერიკის შეერთებული შტატების ელჩს.

  • 21 ივლისს ნედ პრაისმა თქვა, რომ დეზინფორმაცია და პერსონალური თავდასხმები არ შეესაბამება იმას, თუ როგორ ურთიერთობენ პარტნიორები ერთმანეთთან.

ღარიბაშვილის თქმით, ამ ქვეყანაში ყველა ადამიანს აქვს გამოხატვის უფლება, თუმცა ის აღნიშნავს, რომ მეორე მხრივ, საქართველო პატარა სახელმწიფოა, რომელსაც ძლიერი მოკავშირეები სჭირდება.

  • "მინდა, შევახსენო ყველა თანამოქალაქეს, რომ ვართ პატარა სახელმწიფო, ვავითარებთ სტაბილურად ჩვენს ქვეყანას, ვართ ვალდებული და რა თქმა უნდა, ამას სჭირდება ძლიერი მოკავშირეების ყოლა, როგორიცაა, აშშ, ჩვენი მთავარი სტრატეგიული პარტნიორი, ევროპული სახელმწიფოები";
  • "საერთოდ, ჩვენი პატარა სახელმწიფო, მაგრამ ძალიან ძლიერი ხალხი, პარტნიორების და მოკავშირეების გარეშე ვერ მიაღწევს დიდ წარმატებებს".

რას ამბობს ელჩზე: ღარიბაშვილი ამტკიცებს, რომ პატივს სცემს აშშ-ის ყველა წარმომადგენელს, მათ შორის ელჩს. მეტიც, ის კელი დეგნანს "ძალიან აქტიურ" ელჩად მოიხსენიებს და ამბობს, რომ დეგნანი ყველა პროექტის განხორციელებაში ჩართულია.

  • ღარიბაშვილი აქვე აცხადებს, რომ "ასეთი პოლემიკით არ გავაძლიერებთ ჩვენს ურთიერთობას ამერიკასთან, არამედ დავასუსტებთ".
  • "ამიტომ ჩემი, როგორც პრემიერმინისტრის ამოცანა და სურვილია, რომ უფრო გავაძლიეროთ და გავუფრთხილდეთ ამ ურთიერთობებს";
  • "მე ზოგადად არ ვარ წინააღმდეგი, ყველა კითხვა უნდა დაისვას, კრიტიკაც მისაღებია ნებისმიერი ადამიანისგან, მაგრამ მე მინდა ვთქვა, რომ ასეთი პოლემიკის განვრცობა და გადაჭარბება არ იქნება საინტერესო ჩვენი ქვეყნისთვის".