უკრაინის შეიარაღებულმა ძალებმა შეტევითი ოპერაციები ხერსონის რეგიონში სხვადასხვა მიმართულებით დაიწყო. ძლიერი აფეთქებები მთელი დღისა და ღამის განმავლობაში გაგრძელდა. ამ დროისთვის მძიმე ბრძოლები თითქმის მთელ რეგიონში მიმდინარეობს.

რატომ არის მნიშვნელოვანი: 29 აგვისტოს სამხრეთის მიმართულებით უკრაინა შეტევაზე გადავიდა და ხერსონის რეგიონში შეიარაღებულმა ძალებმა რუსების თავდაცვის პირველი ხაზი გაარღვიეს.

• ხერსონი რუსეთისთვის მნიშვნელოვანი რეგიონია, რადგან სწორედ ამ ტერიტორიის დახმარებით ოკუპირებული ყირიმიდან საბრძოლო იარაღისა და პერსონალის მიწოდებას ახდენს.
• რუსეთი ომის დაწყებიდან აქტიურად უტევდა ხერსონის რეგიონს. მტრის ჯარები ქალაქში პირველ მარტს შეიჭრნენ, თუმცა საკრებულოს დაკავება 25 აპრილამდე ვერ შეძლეს.
• ხერსონის მოსახლეობა მასობრივ აქციებს აწყობდა და ოკუპაციას აპროტესტებდა. ხელისუფლების ინფორმაციით, რეგიონში ახლა მოსახლეობის 40-50%-ია დარჩენილი.
• დიდი ბრიტანეთის დაზვერვა აცხადებს, რომ ხერსონის დაკარგვა ძირს უთხრის რუსეთის მცდელობებს, ომი წარმატებულად წარმოაჩინოს.

რა ვიცით ამ დროისთვის: სამხრეთის ოპერატიული სარდლობა იუწყება, რომ სამხედროებმა ხერსონის ოლქის ბერისლავის რაიონში, სოფელ ლვოვოსთან რუსეთის მიერ მდინარე დნეპრზე მოწყობილი გადასასვლელი გაანადგურეს.

• უკრაინის შეიარაღებული ძალების ოპერატიულმა დაჯგუფება კახოვკამ განაცხადა, რომ უკრაინელმა სამხედროებმა HIMARS-ებით უკვე გაანადგურეს ხერსონის მახლობლად მდებარე თითქმის ყველა დიდი ხიდი.
• მათი თქმით, ახლა რუსეთის არმია ყირიმის ტერიტორიიდან იარაღისა და პერსონალის მიწოდებას ვერ შეძლებს, რაც უკრაინისთვის ბრწყინვალე შანსია ტერიტორიების დასაბრუნებლად.
• სარდლობის ცნობით, გაანადგურეს ოკუპანტების საბრძოლო მასალის არაერთი საწყობი და დარჩენილია მხოლოდ ფეხით მოსიარულეთა გადასასვლელები.
• უკრაინის ხელისუფლებამ ადგილობრივ მოსახლეობას სასწრაფო ევაკუაციისკენ მოუწოდა, რადგან მათი თქმით, მოვლენების განვითარება მძლავრი და დინამიკურია.

უკრაინულმა ჯარმა გუშინ ოკუპანტებისგან ხერსონთან მდებარე 4 სოფელი გაათავისუფლა.

• სარდლობის ცნობით, დღის განმავლობაში ოკუპანტებმა 5-ჯერ შეუტიეს მათ პოზიციებს, თუმცა უშედეგოდ.
• მათივე თქმით, განადგურებულია რუსეთის საზენიტო-სარაკეტო სისტემა, 2 ტანკი, 6 ჯავშანმანქანა, 11 ჰაუბიცა და სხვა ტექნიკა, ასევე, ლიკვიდირებულია 82 რუსი სამხედრო.
• გუშინ კახოვკას სამხედრო დაჯგუფებამ განაცხადა, რომ დონეცკის ე.წ. სახალხო რესპუბლიკის 109-ე პოლკმა პოზიციებიდან უკან დაიხია, ხოლო რუსი მედესანტეები, რომლებიც მათ მხარდაჭერას უცხადებდნენ, ბრძოლის ველიდან გაიქცნენ.

რას ამბობს რუსეთი: რუსული სამთავრობო მედია ირწმუნება, რომ ხერსონის მიმართულებით უკრაინელებმა სულ მცირე 8 რაკეტა გაისროლეს და აფეთქების ხმა ხუთჯერ გაისმა.

• პროპაგანდისტული მედიები ოკუპირებული ხერსონის ე.წ. ადმინისტრაციის ინფორმაციაზე დაყრდნობით წერენ, რომ რუსულმა საჰაერო თავდაცვამ ხერსონზე შეტევა მოიგერია.
• რეგიონული ადმინისტრაციის ე.წ. უფროსის მოადგილე ამტკიცებს, რომ ხერსონის ოლქი რუსეთის თავდაცვის სამინისტროს სამხედროების მფარველობის ქვეშაა, აშენდა რამდენიმე თავდაცვითი ხაზი და "რეგიონს საფრთხე არ ემუქრება".

რას ამბობენ ექსპერტები: სამხედრო ექსპერტმა, უკრაინის უსაფრთხოებისა და თანამშრომლობის ცენტრის ხელმძღვანელმა, სერგეი კუზანმა განმარტა, რომ არსებობს თავდაცვის სამი ხაზი და ხერსონის გასათავისუფლებლად უკრაინამ სამივე მათგანი უნდა გაარღვიოს.

• მისი თქმით, ყველაზე მნიშვნელოვანი ახლა ის არის, რომ სამხედროები ანადგურებენ ოკუპანტების საჰაერო თავდაცვას, ანუ "ცას წმენდენ".
• კიდევ ერთი სამხედრო ექსპერტი, ალექსანდრ მუსიენკო აცხადებს, რომ უკრაინის შეიარაღებული ძალების სტრატეგიაა ოკუპანტს შეუქმნას გაუსაძლისი პირობები როგორც ხერსონის რეგიონში, ასევე ზაპოროჟიეს რეგიონის ნაწილში.
• მისი თქმით, ივლის-აგვისტოში უკრაინელი სამხედროები აწარმოებდნენ მოსამზადებელ სამუშაოებს მოწინააღმდეგის თავდაცვის შესუსტებისთვის — ანადგურებდნენ მტრის საწყობებს და სამეთაურო პუნქტებს.
• ექსპერტი ამბობს, რომ ახლა ოკუპანტები სერიოზულ შეცდომებს უშვებენ, უკრაინის შეიარაღებული ძალები კი ამ მომენტს თავდაცვის ხაზების გასარღვევად და ტერიტორიების ეტაპობრივად გასათავისუფლებლად იყენებს.

დიდი ბრიტანეთის დაზვერვის განცხადებით, შორ მანძილზე უკრაინელების ზუსტი დარტყმები ხელს უშლის რუსეთის ძალების შევსებას, თუმცა, უკრაინის მიღწევის მასშტაბის დადასტურება ჯერჯერობით შეუძლებელია.

• უწყების თქმით, თუ უკრაინა მოახერხებს მდგრადი შეტევითი ოპერაციების განხორციელებას, ეს, სავარაუდოდ, საკვანძო ფაქტორი იქნება სამხრეთში რუსეთის თავდაცვის მდგრადობისთვის.