უკრაინის შეიარაღებული ძალების სამხრეთის ოპერატიული სარდლობა იუწყება, რომ სამხედროებმა ხერსონის ოლქის ბერისლავის რაიონში, სოფელ ლვოვოსთან რუსეთის მიერ მდინარე დნეპრზე მოწყობილი გადასასვლელი გაანადგურეს.

რატომ არის მნიშვნელოვანი: უკრაინის შეიარაღებული ძალების ოპერატიულმა დაჯგუფება კახოვკამ განაცხადა, რომ ახლა რუსეთის არმია ყირიმის ტერიტორიიდან იარაღისა და პერსონალის მიწოდებას ვერ შეძლებს, რაც უკრაინისთვის ბრწყინვალე შანსია ტერიტორიების დასაბრუნებლად.

  • 29 აგვისტოს სამხრეთის მიმართულებით უკრაინა შეტევაზე გადავიდა და ხერსონის რეგიონში შეიარაღებულმა ძალებმა რუსების თავდაცვის პირველი ხაზი გაარღვიეს.

დეტალები: კახოვკამ განაცხადა, რომ უკრაინელმა სამხედროებმა ამერიკული სარაკეტო სისტემა HIMARS-ებით უკვე გაანადგურეს ხერსონის მახლობლად მდებარე თითქმის ყველა დიდი ხიდი.

  • სარდლობის ცნობით, დღის განმავლობაში ოკუპანტებმა 5-ჯერ შეუტიეს მათ პოზიციებს, თუმცა უშედეგოდ.
  • მათივე თქმით, განადგურებულია რუსეთის საზენიტო-სარაკეტო სისტემა, 2 ტანკი, 6 ჯავშანმანქანა, 11 ჰაუბიცა და სხვა ტექნიკა, ასევე, ლიკვიდირებულია 82 რუსი სამხედრო.

უკრაინულმა ჯარმა გუშინ ოკუპანტებისგან ხერსონთან მდებარე 4 სოფელი გაათავისუფლა. ინფორმაცია CNN-მა გაავრცელა.

  • CNN-ს წყარომ განუცხადა, გათავისუფლებულია სოფლები: ნოვა დმიტრივკა, არხანგელსკოე, ტომინა ბლანკა და პრავდინო.
  • მათივე ცნობით, დაიღუპა და ტყვედ ჩავარდა ბევრი რუსი სამხედრო, ასევე, განადგურებულია რუსული სამხედრო ტექნიკა.