UNICEF-ის აღმასრულებელმა დირექტორმა, კეტრინ რასელმა განაცხადა, რომ ეს მხოლოდ ციფრებია, რომლის გადამოწმებაც გაერომ შეძლო, თუმცა რეალური რიცხვი გაცილებით მაღალი იქნება.

რატომ არის მნიშვნელოვანი: პუტინის გაუმართლებელ ომს, რომელიც თითქოსდა დემილიტარიზაციას ემსახურება, მშვიდობიანი მოქალაქეები, მათ შორის, ბავშვებიც ეწირებიან.

  • რუსებმა არაერთხელ დაბომბეს დასახლებები, ევაკუაციის სივრცეები და თავშესაფრები, წარწერით "ბავშვები".
  • ეს კიდევ ერთხელ უსვამს ხაზს ოკუპანტების სისასტიკეს და იმას, რომ პუტინი საკუთარი მიზნების მისაღწევად არაფერს ერიდება.

დეტალები: კეტრინ რასელმა თქვა, რომ მათი ვარაუდით 10 სკოლიდან ერთი დაზიანებული ან დანგრეულია.

  • "სასწავლო წლის დაწყება სულ რაღაც ერთ კვირაში არის მკვეთრი შეხსენება იმისა, თუ რამდენი დაკარგეს უკრაინაში ბავშვებმა".
  • "უკრაინის საგანმანათლებლო სისტემა განადგურდა საომარი მოქმედებების ესკალაციის გამო მთელი ქვეყნის მასშტაბით. სკოლები იყო სამიზნე, რის შედეგადაც ოჯახები თავს უსაფრთხოდ ვერ გრძნობენ თავიანთი შვილების სკოლაში გაგზავნისას".

რიცხვებში: უკრაინის პროკურატურის ინფორმაციით, ომის დაწყებიდან დღემდე 373 ბავშვი დაიღუპა, 721-ზე მეტი ბავშვი დაშავდა, მათ შორის:

  • დონეცკის ოლქში — 387;
  • ხარკოვის ოლქში — 202;
  • კიევის ოლქში — 116;
  • ჩერნიგოვის ოლქში — 68.

გაეროს განცხადებით, ომი დამანგრეველ გავლენას ახდენს უკრაინის 7,5 მილიონ ბავშვზე.

  • ორგანიზაციის მონაცემებით, უკრაინელ ლტოლვილთა რიცხვი 11 მილიონს გადასცდა.