ბრიფინგზე პრეზიდენტმა განაცხადა, რომ იცის ვეტო დაძლეული იქნება, მაგრამ მას იყენებს, რადგან ცვლილებებს არ ეთანხმება.

დეტალები: მანვე აღნიშნა, რომ 6 თვის განმავლობაში ვეტოს დაადებს ყველა კანონპროექტს, რომელიც არასწორი მიმართულებით იქნება მიღებული.

  • "ეს არის უფრო პოლიტიკური ვეტო, ვიდრე სამართლებრივი, რადგან არ შეიძლება, რომ ამ დღეებში საქართველოში მიღებული იყოს ასეთი კანონი, რომელიც კიდევ ავიწროებს ადამიანის უფლებებს, როცა პირიქით გვთხოვენ, რომ ამ მიმართულებით ჩვენ მივცეთ მეტი გარანტიები, ვიყოთ უფრო დემოკრატიული, ვიყოთ უფრო ევროპული".

რატომ არის მნიშვნელოვანი: 9 ივნისს არასამთავრობო ორგანიზაციებმა პრეზიდენტს მოუწოდეს, ფარული მიყურადების გაუარესებული კანონმდებლობისთვის ვეტო დაედო.

  • მათი თქმით, საკანონმდებლო ცვლილებები არაერთი ხარვეზით ხასიათდება და განსაკუთრებით გამოყოფენ, ფარული საგამოძიებო მოქმედებების ვადასთან და პირისათვის ფარული საგამოძიებო მოქმედებების შეტყობინებასთან დაკავშირებული ახალ წესებს.

NGO-ები აღნიშნავენ, რომ მიღებული კანონი არ შეესაბამება ადამიანის უფლებათა დაცვის საერთაშორისო ნორმებს და ადამიანის უფლებათა დაცვის ევროპული სასამართლოს პრაქტიკას.

  • მათი განცხადებით, კანონმდებლობაში ადამიანის უფლების დაცვის სტანდარტების კიდევ უფრო გაუარესება ცალსახად უკან გადადგმული ნაბიჯია საქართველოს დემოკრატიული განვითარების კუთხით. მათი თქმით, ამას მიუთითებს ევროკავშირის დელეგაციის მიერ 8 ივნისს გავრცელებული განცხადება.

ევროკავშირის ელჩის თქმით, ფარულ მიყურებასთან დაკავშირებული ცვლილებები მოქალაქეების პერსონალური მონაცემების დაცვის გარანტიების გარეშე მნიშვნელოვნად ზღუდავს მათი პირადი ცხოვრების ხელშეუხებლობას.

არქივიდან: 7 ივნისს პარლამენტმა ქართული ოცნების ინიცირებით საქართველოს სისხლის სამართლის საპროცესო კოდექსში ცვლილებები მიიღო.

  • ახალი კანონმდებლობის შესაბამისად, გახანგრძლივდა ფარული საგამოძიებო მოქმედებების ჩატარებასთან დაკავშირებული ვადები და გაიზარდა ის დანაშაულები, რომლებზეც ფარული საგამოძიებო მოქმედებების ჩატარება იქნება დასაშვები.