ბოლო ერთ წელში საქართველოში საარსებო შემწეობის მიმღებთა რაოდენობა 104 953 ადამიანით გაიზარდა და მაისის მდგომარეობით, 656 591-ს მიაღწია. ეს რეკოდულად მაღალი მაჩვენებელია.

რატომ არის მნიშვნელოვანი: ქვეყანაში სიღარიბის დაძლევა კვლავ გამოწვევად რჩება. ამას ბოლო 10 წლის განმავლობაში ინფლაციის ერთ-ერთი ყველაზე მაღალი მაჩვენებელი ემატება.

  • მაღალი ინფლაცია დაბალი შემოსავლის მქონე მოსახლეობისთვის განსაკუთრებულ პრობლემას ქმნის, რადგან ფასები ყველაზე მეტად სურსათზე იზრდება.
  • დახმარების მიმღებთა რაოდენობა ზოგიერთ რაიონში მოსახლეობის 50%-ს აჭარბებს.

დეტალები: მაისის მდგომარეობით, სოციალურ დამარებას საქართველოს მოსახლეობის 17,6% იღებს. ბოლო ერთ წელში მნიშვნელოვნად არის გაზრდილი ამ პროგრამისთვის გამოყოფილი ბიუჯეტი.

  • მაისში შემწეობის მიმღებთათვის გადარიცხული თანხის მოცულობა წლიურად 14 160 477 ლარით, 44,728,319 ლარამდე გაიზარდა.
  • სავარაუდოდ, პროგრამის ბიუჯეტი კიდევ უფრო მოიმატებს, რადგან პირველი ივნისიდან სოციალურად დაუცველი ბავშვების დახმარება 50 ლარით, 150 ლარამდე გაიზარდა.

რას ამბობენ მთავრობაში: ჯანდაცვის სამინისტროში საარსებო შემწეობის მიმღებთა რაოდენობის ზრდას ბენეფიციართა შეფასებაზე გამოცხადებულ მორატორიუმს უკავშირებენ.

  • პრემიერმინისტრის, ირაკლი ღარიბაშვილის თქმით, დასაქმების პროგრამის ფარგლებში 200 ათასზე მეტი სოციალურად დაუცველი ადამიანი დასაქმდება.