რუს ტანმოვარჯიშე ივან კულიაკს მარტში კატარში გამართული შეჯიბრების დროს მოპოვებული ბრინჯაოს მედალი და საპრიზო თანხა ჩამოართვეს. სპორტსმენს ტანვარჯიშის საერთაშორისო ფედერაციამ შეჯიბრში მონაწილეობა 1 წლით აუკრძალა. ამის მიზეზი კი ის გახდა, რომ ივანს დაჯილდოებაზე მაისურზე Z სიმბოლო ეწერა — რუსეთის მიერ უკრაინაში შეჭრის მხარდასაჭერად.

Z სიმბოლო უკრაინაში შეჭრილი რუსეთის ჯარის სამხედრო მანქანებზეა გამოსახული. სიმბოლოს რუსეთის აგრესიის მხარდამჭერები აქტიურად იყენებენ. აღსანიშნავია ისიც, რომ ივანს მაისური დაჯილდოებაზე უკრაინელი სპორტსმენის გვერდით დგომისას ეცვა. უკრაინელმა ილია კოვტუნმა ოქროს მედალი მოიპოვა.

"სიმბოლო ჩვენს სამხედროებზე ვნახე და მისი მნიშვნელობაც გავიგე. როგორც აღმოჩნდა, ის გამარჯვებასა და მშვიდობას ნიშნავს. სხვისთვის ზიანის მიყენება არ მიფიქრია, უბრალოდ ჩემი პოზიცია დავაფიქსირე", — განაცხადა გადაწყვეტილების შესახებ კულიაკმა.

კულიაკმა 500 შვეიცარიული ფრნაკის ($513.92) ოდენობით საპრიზო თანხაც უნდა დააბრუნოს. მას გადაწყვეტილების გასასაჩივრებლად 21 დღე აქვს.