საქართველოს დამოუკიდებლობის დღისადმი მიძღვნილ ღონისძიებებთან დაკავშირებით, 18 მაისის 00:00 საათიდან 26 მაისის ჩათვლით პირველი რესპუბლიკისა და თავისუფლების მოედნებზე ტრანსპორტის მოძრაობა შეიზღუდება. ინფორმაციას თბილისის მერია ავრცელებს.

"რესპუბლიკის მოედანზე შემხვევ სატრანსპორტო საშუალებებს რუსთაველის გამზირისკენ მოძრაობისას გადაადგილება მხოლოდ ჯავახიშვილის ქუჩიდან კოსტავას ქუჩის გავლით შეეზღუდებათ, ხოლო რუსთაველის გამზირიდან პირველი რესპუბლიკის მოედანზე გადაადგილება უცვლელი დარჩება. სატრანსპორტო საშუალებებისთვის კოსტავას ქუჩიდან პირველი რესპუბლიკის მოედანზე მოხვედრა შესაძლებელი იქნება კოსტავას ქუჩისა და რუსთაველის გამზირის გამოყენებით", — ნათქვამია ინფორმაციაში.

თავისუფლების მოედანზე წრე შეიზღუდება ერთი სამოძრაო ზოლით, ხოლო ტრანსპორტის გადაადგილების მიმართულებები უცვლელი დარჩება.

მერიის განცხადებით, საზოგადოებრივი ტრანსპორტის მოძრაობაზე ცვლილება ჯავახიშვილის ქუჩიდან პირველი რესპუბლიკის მოედნის მიმართულებით მოძრავ #308; #359 ავტობუსებსა და #457 მიკროავტობუსს შეეხება. ისინი გადაადგილებას კოსტავას ქუჩის მიმართულებით გააგრძელებენ და თბილისის საკონცერტო დარბაზთან დატრიალდებიან.