უკრაინის რაიონ ბუჩაში მშვიდობიანი მოსახლეობის მიმართ რუსი ოკუპანტების გამოვლენილმა სისასტიკემ მთელი მსოფლიო შეძრა. სასტიკად მოკლული უკრაინელების სურათებს შორის, რომლებიც რუსეთის გაუგონარი აგრესიის საილუსტრაციოდ გავრცელდა, ერთ-ერთ ფოტოზე მსხვერპლი ქალი ვიზაჟისტმა ანასტასია სუბაჩევამ მანიკუირით ამოიცნო.

მოვლილი ხელი ფრჩხილის წითელი და თეთრი ლაქით — გარდაცვლილი ქალი ანასტასია სუბაჩევას ასეთი სწორედ მაკიაჟის გაკვეთილებიდან ახსოვდა. სუბაჩევას ბუჩაში მაკიაჟის დახვეწისა და კოსმეტიკური საშუალებების სწორად გამოყენების შესასწავლი კურსი ჰქონდა, რომელსაც ირინა ფილკინაც გადიოდა.

ანასტასიას მისი მანიკურიანი ხელი იმიტომ დაამახსოვრდა, რომ სულ პომადა ან ფუნჯი ეჭირა. ახლა კი ეს ხელი უსიცოცხლო, ჭუჭყით დაფარული იდო ქუჩაში.

"როცა დავინახე, ვიგრძენი, რომ გული საშინლად ჩამწყდა", — უთხრა სუბაჩევამ The New York Times-ს სატელეფონო საუბრისას ქალაქ კროპივნიცკიდან, სადაც ოჯახთან ერთად გაიქცა.

ანასტასია სუბაჩევა, რომელიც ბუჩაში ხუთი წელი ვიზაჟისტად მუშაობდა, ამბობს, რომ იქ უამრავ ქალს იცნობს, რადგან ბევრი მათგანი მისი კლიენტი იყო.

ფოტოზე გამოსახული ქალი, ირინა ფილკინა, რომელიც 52 წლის იყო, თებერვალში დაუკავშირდა სუბაჩევას მაკიაჟის გაკვეთილებზე ჩასაწერად. ის ოცნებობდა, რომ პოპულარული გამხდარიყო და ინსტაგრამის გამომწერების რაოდენობა გაეზარდა, იხსენებს ვიზაჟისტი.

ირინა ფილკინა ვიზაჟისტის დახმარებით ცდილობდა, უფრო მომხიბვლელი და მოდური გამხდარიყო. ის მოუთმენლად ელოდა უკრაინელი პოპმომღერლის ოლია პოლიაკოვას კონცერტს და გაკვეთილებზე იმასაც ჰყვებოდა, თუ რას ჩაიცვამდა და როგორ გაიკეთებდა მაკიაჟს ამ ღონისძიებაზე.

"საბოლოოდ ყველაზე მნიშვნელოვანს მივხვდი: უნდა გიყვარდეს საკუთარი თავი და უნდა იცხოვრო კიდეც მისთვის, ჰოდა ვიცხოვრებ ისე, როგორც მინდა" — ბოლო საუბრისას, ეს უთხრა ფილკინამ სუბაჩევას.

როგორც აღმოჩნდა, ომმა მის ყველა ოცნებას ერთდროულად მოუღო ბოლო.

ფილკინას შვილმა, ოლჰა შჩირუკმა, რომელიც ბუჩადან ომის დაწყების შემდეგ გაიქცა, 6 მარტს გაიგო, რომ დედამისი მოკლეს: მაშინ ესროლეს, როცა სამსახურიდან ველოსიპედით ბრუნდებოდა.

დაახლოებით ერთი თვის განმავლობაში ოლჰას მაინც ჰქონდა იმედი, რომ დედა ჯერ კიდევ ცოცხალი იყო.

"მესმის, რომ ეს შეუძლებელი იყო, რადგან ის კონტაქტზე ერთი თვის განმავლობაში არ გამოდიოდა, მაგრამ შვილი ხომ ყოველთვის ელოდება დედას", — თქვა მან.

პირველ აპრილს, დედამისის დაბადების დღეზე, ოლჰამ მიიღო ვიდეო, სადაც დედამისი უსიცოცხლოდ წევს მიწაზე და იმ ხელის სურათი, რომლითაც ირინა ამოიცნეს.

"მანიკიურის გარეშეც მივხვდებოდი, რომ ის დედაჩემი იყო"

ოლჰა ამბობს, რომ დედის ცხედარს ჯერ კიდევ ეძებს.