არასამთავრობო ორგანიზაციების განცხადებით, მიმდინარე მოვლენების ფონზე, ისტორიული შანსი ჩნდება, რათა საქართველო დასავლური სამყაროს სრულფასოვანი წევრი გახდეს. მათივე თქმით, ქვეყანა დასავლეთისა და განვითარებული მსოფლიოს გვერდით, ცალსახად და არაორაზროვნად უნდა იდგეს.

"საპირისპირო გადაწყვეტილებას ქართველი ხალხი არ დაუშვებს! სამწუხაროდ, საქართველოს მთავრობის მიერ გადადგმული ნაბიჯები, ბუნდოვანი და არათანმიმდევრული რიტორიკა ეჭვებს აჩენს მისი, როგორც დასავლეთის ქვეყნების პარტნიორის სანდოობასთან და ერთგულებასთან დაკავშირებით", — ნათქვამია განცხადებაში.

მათივე თქმით, დასავლური სამყარო უკრაინის მიმართ უპრეცედენტო ერთიანობას აჩვენებს. ამასთან, დასავლელი უმაღლესი პოლიტიკური თანამდებობის პირების გადაწყვეტილება, პუტინის დამნაშავე რეჟიმმა საკადრისი პასუხი აგოს, ურყევია.

"მსოფლიოს უდიდესმა ნაწილმა გააკეთა არჩევანი უკრაინის თავისუფლებისა და ერთიანობის სასარგებლოდ, თუმცა ეს ბევრად მეტია, ვიდრე მხოლოდ ბოროტების მანქანის წინააღმდეგ მებრძოლი უკრაინა – ესაა არჩევანი მსოფლიოში მშვიდობის, დასავლური სამყაროს ერთიანობის, წესრიგსა და თანასწორობაზე დამყარებული სტაბილურობის სასარგებლოდ. საქართველოსთვის ეს არჩევანი ყოველთვის ცხადი და ბუნებრივი იყო. ჩვენმა ქვეყანამ ერთ-ერთმა პირველმა და არაერთგზის იწვნია რუსეთის აგრესია და ექსპანსიონიზმი, რაშიც ათასობით ჩვენი მოქალაქის სიცოცხლის ძალიან ძვირი ფასი გადავიხადეთ", — ამბობს ის.

ორგანიზაციების თქმით, იმისთვის, რომ ქვეყნის სტრატეგიული ინტერესები სრულად და მკაფიოდ იყოს გაცხადებული, შემდეგი ნაბიჯები უნდა გადაიდგას:

• მმართველმა ძალამ ღიად და ერთმნიშვნელოვნად დააფიქსიროს ქვეყნის მხარდაჭერა უკრაინის მიმართ, ასევე, დასავლეთის მხრიდან უკრაინის მხარდამჭერი ნაბიჯებისადმი და შეწყვიტოს ქვეყნის საერთაშორისო რეპუტაციის შემლახველი პოზიციონირება; მკაფიოდ განაცხადოს, რომ იგი ერთგულია დასავლეთის ქვეყნების მიერ დაწესებული საერთაშორისო სანქციების რეჟიმის;
• ქართულმა ოცნებამ დაუყოვნებლივ შეწყვიტოს მოქალაქეების ომით დაშინება და ამ გზით, მათი დემორალიზება, რაც ბოლო პერიოდში გამოკვეთილ პროპაგანდისტულ ხაზად გასდევს არა მხოლოდ მმართველი ძალის წარმომადგენელთა განცხადებებს, არამედ გააქტიურებულია მათთან აფილირებული პირების რიტორიკაშიც;
• ქართულმა ოცნებამ უარი თქვას სიძულვილის ენაზე, დადგეს ვიწრო პარტიულ ინტერესებზე მაღლა და გააკეთოს ყველაფერი საზოგადოებაში პოლარიზაციის შესამცირებლად;
• მთავრობამ საზოგადოებას რეგულარულად მიაწოდოს ინფორმაცია, თუ რა ნაბიჯები იდგმება საქართველოსთვის ევროკავშირის წევრობის კანდიდატის სტატუსის მინიჭების საკითხის ადვოკატირების კუთხით;
• საქართველოს პრეზიდენტისა და ოპოზიციის მონაწილეობით შედგეს უსაფრთხოების საბჭოს გაფართოებული შეხვედრა და საზოგადოებას მიეწოდოს ინფორმაცია ქვეყნის წინაშე არსებული გამოწვევებისა და მათი გადაჭრის გზების თაობაზე;
• პარლამენტში, უმრავლესობის, ოპოზიციის, მთავრობისა და ექსპერტული წრეების მონაწილეობით შედგეს განხილვა, თუ როგორ აისახება საქართველოს ეკონომიკაზე რუსეთის უკრაინაში შეჭრისა და საპასუხოდ მისი დასანქცირების შედეგები და რა არის ამ ვითარებიდან საუკეთესო გამოსავალი.

განცხადების ხელმომწერი ორგანიზაციები არიან:

• საერთაშორისო გამჭვირვალობა-საქართველო (TI Georgia);
• სამართლიანი არჩევნებისა და დემოკრატიის საერთაშორისო საზოგადოება (ISFED);
• საქართველოს რეფორმების ასოციაცია (GRASS);
• ღია საზოგადოების ფონდი (OSGF);
• ცენტრი ემპათია;
• კვლევითი ჟურნალისტიკის და ეკონომიკური ანალიზის ცენტრი საქართველოს დემოკრატიული ინიციატივა (GDI);
• ინფორმაციის თავისუფლების განვითარების ინსტიტუტი (IDFI);
• საზოგადოება და ბანკები მედიის განვითარების ფონდი (MDF);
• საქართველოს გაეროს ასოციაცია (UNAG);
• მწვანე ალტერნატივა ეკონომიკური პოლიტიკის კვლევის ცენტრი (EPRC);
• დემოკრატიისა და უსაფრთხო განვითარების ინსტიტუტი ევროპის ფონდი უფლებები;
• საქართველო სამოქალაქო საზოგადოების ინსტიტუტი ლიბერალური აკადემია
• საქართველოს ატლანტიკური საბჭო ადამიანის უფლებათა ცენტრი საფარი;
• ტოლერანტობის და მრავალფეროვნების ინსტიტუტი (TDI).