აქტივისტი სამირა ბაირამოვა, რომელსაც პრორუსული, ჰომოფობიური და ძალადობრივი ალტ-ინფოს წევრები ემუქრებოდნენ, წერს, რომ მათ პირველი მუქარა შეასრულეს და მარნეულში ენმ-ის ოფისი შეღებეს. ბაირამოვა ფოტოებს აქვეყნებს, სადაც ჩანს, რომ ენმ-ის ოფისზე შეურაცხმყოფელი წარწერებია გაკეთებული.

აქტივისტის თქმით, ალტ-ინფოს წევრებმა იციან, რომ ის ენმ-ის წევრი არ არის და ოფისის შეღებვა მათი პროვაკაციაა. ბაირამოვას თქმით, იმედი აქვს, რომ შსს-ს ესმის, რამდენად საშიშები არიან ალტ-ინფოს წარმომადგენლები.

On.ge დამატებითი ინფორმაციის გარკვევას შსს-ში ცდილობს.

მანამდე, ალტ-ინფოს ოფისზე ბანერების შეღებვის შემდეგ სამირა ბაირამოვამ მუქარის შემცველი და შეურაცხმყოფელი შეტყობინებები მიიღო. მან საგამოძიებო უწყებას იმავე დღეს მიმართა. შსს-მ გამოძიება სისხლის სამართლის 151-ე მუხლით დაიწყო, რაც სიცოცხლის მოსპობის ან ჯანმრთელობის დაზიანების მუქარას გულისხმობს.