გორის სამხედრო ჰოსპიტალში ექსპრეზიდენტ მიხეილ სააკაშვილის მონახულების შემდეგ მისმა პირადმა ექიმმა ნიკოლოზ ყიფშიძემ განაცხადა, რომ სააკაშვილს ჯანმრთელობის სამი ახალი პრობლემა გაუჩნდა, რომელიც მას ადრე არ ჰქონდა. ყიფშიძის თქმით, პაციენტის ჯანმრთელობის მდგომარება სტაბილურად ცუდია.

"პრეზიდენტის მდგომარეობა არადამაკმაყოფილებელია, გრძელდება საერთო სისუსტე. ასევე, აღვნიშნავდი დისბალანსს, სიარულის პრობლემები აქვს, პლიუს ამას დაემატა რამდენიმე ახალი პატარა რაღაცები. ნუ, პირველ რიგში, ეს არის კუჭ-ნაწლავის პრობლემები, რომელიც ბოლო 2 დღის განმავლობაში განუვითარდა. უნდა დავაკვირდეთ, რა უნდა ვქნათ და მეორე არის ნეიროდეფიციტი. ნეიროდეფიციტი, ჩემი აზრით, გამოხატულია და საჭიროებს კორეგირებას, რაც შეიძლება სწრაფად... ასევე, არის გამოკვეთილი ანემია, რომელიც ადრე მას არ ჰქონდა", — განაცხადა ყიფშიძემ.

ნიკოლოზ ყიფშიძესთან ერთად გორის სამხედრო ჰოსპიტალში სახალხო დამცველი და სამედიცინო ექსპერტთა ჯგუფიც იმყოფებოდა. სააკაშვილის უფლებრივ მდგომარეობაზე საუბრისას ნინო ლომჯარიამ განაცხადა, რომ მესამე პრეზიდენტს სასეირნოდ ღია სივრცე არ აქვს. ომბუდსმენის თქმით, როგორც პაციენტს მას მეტი ფიზიკური დატვირთვა სჭირდება.

ექსპერტთა ჯგუფის წევრის, ფსიქიატრ მარინა კურატაშვილის თქმით, არის გარკვეული პრობლემები ფსიქიკური სფეროს მხრივ, მაგრამ დიაგნოზზე ფსიქიატრი ჯერ ვერ საუბრობს.

ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს. უკრაინაში მცხოვრები სააკაშვილი საქართველოში სექტემბრის ბოლოს, საარჩევნოდ დაბრუნდა, რომლის შემდეგაც ის პირველ ოქტომბერს დააკავეს. დაკავების პირველივე დღიდან მან შიმშილობა გამოაცხადა. შიმშილობა გაგრძელდა გლდანის მე-18 დაწესებულებაშიც, სადაც მისი განცხადებით, მოტყუებითა და იძულებით გადაიყვანეს. სააკაშვილმა შიმშილობა მას შემდეგ შეწყვიტა, რაც იუსტიციის სამინისტრომ გორის სამხედრო ჰოსპიტალში გადაყვანა შესთავაზა.