10 წლის ევანი ჰელოუინის განწყობის შესაბამისად სკოლაში ტონი სტარკის კოსტიუმში გამოწყობილი წავიდა. მართალია, საყვარელი გმირის როლი იდეალურად მოირგო, თუმცა სკოლაში წასვლა მერსედესის ნაცვლად ავტობუსით მოუწია.

მისი დღის ეს ბედნიერი დასაწყისი მალე მწუხარებით შეიცვალა, რადგან ავტობუსით მიმავალმა სხვა ბავშვებმა ევანს კოსტიუმის გამო დასცინეს. დამამცირებელი შენიშვნები იმდენად მტკივნეული აღმოჩნდა მისთვის, რომ მასწავლებლებმა შენიშნეს, როგორი დასევდიანებული იყო და დედამისს დაურეკეს.

ევანის დედამ ფეისბუქის საკუთარ გვერდზე ფოტოები გაავრცელა, რომელშიც ბედნიერი ევანს ჯერ კოსტიუმით, მოგვიანებით კი მოწყენილს ვხედავთ.

"რამდენიმე ბავშვმა ევანს უთხრა, რომ სულელურად გამოიყურება. ამის გამო როგორც კი სკოლაში მივიდა, საპირფარეშოში გაიქცა და სახიდან მაკიაჟი მოიშორა. როცა დამირეკა, ტიროდა და სკოლაში ჰელოუინის წვეულებაზე დარჩენაც კი აღარ უნდოდა. ბავშვებმა უნდა იცოდნენ, რომ სიტყვებით დიდი ტკივილის მიყენება შეიძლება", — ვკითხულობთ ფეისბუქზე გამოქვეყნებულ პოსტში.

რა თქმა უნდა, დედამ ევანი სკოლიდან მაშინვე წამოიყვანა, თუმცა წახემსებისა და მის გრძნობებზე საუბრის შემდეგ, ევანმა გადაწყვიტა, რომ მაკიაჟი ისევ გაეკეთებინა და სკოლაში დაბრუნებულიყო, რათა სხვებისთვის მისი ასე მარტივად დამცირების უფლება არ მიეცა.

მომხდარის შესახებ სოციალურ ქსელში საჯაროდ მოყოლილ ამბავს დიდი გამოხმაურება მოჰყვა: ამ მოვლენების პარალელურად, ევანი ინტერნეტში უამრავ გასამხნევებელ შეტყობინებას იღებდა. "მთელი მსოფლიოდან თქვენმა ემოციურმა გზავნილებმა და მხარდაჭერამ ევანი დაარწმუნა, რომ სამყაროში იმათზე ბევრად უკეთესი ხალხი ცხოვრობს, ვინც მას დასცინა", — წერს ევანის დედა.

დედის თქმით, მისმა შვილმა ამ დღისგან დიდი გამოცდილება მიიღო: ევანმა ისწავლა, რომ სიტყვები ყოველთვის ფრთხილად უნდა შეარჩიოს, რათა სხვას მის მსგავსად გული არასდროს ატკინოს. მან ისიც ისწავლა, რომ სხვა ადამიანების მოსაზრებებმა მის გრძნობებზე ნაკლები გავლენა უნდა მოახდინოს.

ახლა მარტო რობერტ დაუნ უმცროსის ჯერია, რომ ევანს ჰელოუინის კოსტიუმი და სიმამაცე შეუქოს!

ფოტო: Marvel