ჯგუფი ზამთრის მარაგი ბათუმში დაზარალებული ოჯახებისთვის ნივთებს აგროვებს. როგორც ზამთრის მარაგის ორგანიზატორი, ზურა ნიჟარაძე წერს, ჯგუფის მთელი რესურსი ამ ტრაგედიას მოხმარდება და დაზარალებულებისთვის საცხოვრებელი პირობების შესაქმნელად ტანსაცმელს, საოჯახო ნივთებსა და ჰიგიენურ საშუალებებს შეაგროვებს.

"მარაგელებო, ალბათ, თქვენ, ისევე როგორც ჩვენ, მთელი დღე შიშით ადევნებთ თვალს ბათუმის ტრაგედიის კადრებს. საორგანიზაციო ჯგუფმა გადავწყვიტეთ, რომ მომდევნო დღეები და მთლიანად მარაგის რესურსი ბათუმისკენ მივმართოთ", — წერს ნიჟარაძე.

ზამთრის მარაგს ამ ეტაპზე ეძებს მოხალისე-მძღოლებს, რომლებიც იმ ადამიანებს მიაკითხავენ, რომლებიც ნივთების ჩამბარებელ პუნქტებზე მიტანას ვერ ახერხებენ. ასევე, გუნდს სჭირდება მოხალისეები, რომლებიც ჩამბარებელი პუნქტის შესაქმნელად ჯგუფს ნებისმიერ ქალაქში არსებულ თავისუფალ ფართს დროებით დაუთმობს. ზამთრის მარაგი მალე შექმნის ანგარიშის ნომერსაც, რომელზეც მოქალაქეებს დაზარალებულების დასახმარებლად თანხის გადარიცხვა შეეძლებათ.

მსურველებს ნივთების მიტანა ამ ეტაპზე თბილისში, ქუთაისსა და ლენტეხში შემდეგ მისამართებზე შეეძლებათ:

  • თბილისი: რაფიელ აგლაძის 34/4 - 598 798 797 (FB: Zura Nizharadze)
  • ქუთაისი: გვანცელაძის პირველი შესახვევი N10 - 597 74 14 01 (FB: Eka Murtskhveladze)
  • ლენტეხი: 599 32 12 89 (FB: ბესიკ ცოდვილი ლიპარტელიანი).

მალე გახდება ცნობილი ბათუმის ჩამბარებელი პუნქტის მისამართიც. ასევე, ჯგუფის ერთ-ერთი წევრი ნათია აბდალაძე ნივთებს მილანში შეაგროვებს და იქიდან გამოგზავნის. სხვა ემიგრანტებს, რომელთაც ნივთების გამოგზავნის სურვილი ექნებათ, შეუძლიათ ჯგუფის მოდერატორებს დაუკავშირდნენ.

მეტი დეტალის გასაგებად ეწვიეთ ჯგუფს.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, დაღუპულია 9 ადამიანი. ერთ-ერთი 9 ოქტომბერს საავადმყოფოში გარდაიცვალა. დაღუპულებს შორის 3 არასრულწლოვანია, ერთი 7 წლის, მეორე წლისა და 3 თვის და მესამე 12 წლის.

ბათუმში სამაშველო ღონისძიება თითქმის 30 საათის განმავლობაში მიმდინარეობდა.