კლინიკა მედცენტრის ექიმის განცხადებით, ნანგრევებიდან ამოყვანილი მეორე ადამიანის მდგომარეობა მძიმეა. იგი საავადმყოფოში მიყვანისას გონზე იყო და ამ ეტაპზე კვლევებს უტარებენ.

"შემოსვლის დროს მისი მდგომარეობა შეფასდა როგორც მძიმე. პაციენტი იყო გონზე, აღენიშნება სხეულის ზოგადი დაჟეჟილობები, გულ-მკერდის დახურული ტრავმა, სხეულის ზოგადი დაჟეჟილობები, გულ-მკერდის დახურული ტრავმა, მარცხენა კოჭ-წვივის დაზიანება, ღია მოტეხილობა. ახლა უტარდება დამატებითი კვლევები. დანარჩენს მოგახსნებთ, როგორც კი დასრულდება კვლევები", — ამბობენ საავადმყოფოში.

მაშველებმა ნანგრევებიდან მეორე ადამიანი დაახლოებით ერთი საათის წინ ამოიყვანეს. ამ დროისთვის გავრცელებული ინფორმაციის მიხედვით, მძიმეა ნანგრევებიდან ამოყვანილი პირველი ქალის მდგომარეობაც. იგი მართვით სუნთქვაზე იმყოფება.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველები 12 საათზე მეტია ცდილობენ ნანგრევების ქვეშ მოყოლილი ადამიანების ამოყვანას. დღის განმავლობაში ნანგრევების ქვეშ მოყოლილი მანქანიდან ამოიყვანეს წლის და 3 თვის ბავშვი. ის საავადმყოფოდან უკვე გაწერეს.

შინაგან საქმეთა მინისტრ ვახტანგ გომელაურის ინფორმაციით, ნანგრევებში ერთი ადამიანის ცხედარი იპოვეს, თუმცა ინფორმაციას 100%-ით ვერ ადასტურებს.

ამ დრომდე უცნობია ნგრევის მიზეზი. შს მინისტრის თქმით, შესაძლოა, ეს ქვედა სართულზე მიმდინარე სამუშაოები იყოს, რომელსაც მესაკუთრეები აკეთებდნენ. თუმცა გომელაური დაძენს, რომ ჯერ გამოძიება მიმდინარეობს და ზუსტი ინფორმაცია არ აქვთ.

გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.