On.ge-ის გუნდში ცვლილებებია. On.ge-ის ჟურნალის განყოფილებას, რომელიც ქვიზებს, გასართობ სტატიებს, კულტურის და ხელოვნების სიახლეებს აერთიანებს, თემუკა ზოიძე უხელმძღვანელებს. ამ პოზიციაზე მან თამარა ღამბაშიძე ჩაანაცვლა, რომელიც On.ge-ის ჟურნალის მთავარი რედაქტორის ფუნქციას 2019 წლიდან ასრულებდა.

თემუკას On.ge-ისთან პირველი შეხება 2019 წელს ჰქონდა, როცა პროექტ On.ge რჩეულის მონაწილე გახდა. პროექტი ილიას სახელმწიფო უნივერსიტეტთან ერთად ხორციელდება და გამორჩეულ სტუდენტებს საშუალებას აძლევს, On.ge-ში ანაზღაურებადი სტაჟირება გაიარონ.

სტაჟირების პროგრამის დასრულების შემდეგ თემუკა ზოიძე On.ge-ის ჟურნალისტი გახდა და წარმატებით წერდა სტატიებს როგორც სოციალურ თემებზე, ისე კინოსა და ლიტერატურაზე. პარალელურად იყო On.ge რჩეულის უმცროსი რედაქტორი და სტუდენტებს საკუთარ გამოცდილებას უზიარებდა.

"On.ge ერთგულ მკითხველს თავისი უშუალო ტონისა და დამოკიდებულებების გამო უყვარს და სწორედ ამ მეგობრული განწყობით ამიერიდან უფრო მეტი ძალისხმევით ვეცდებით, რომ ის წიგნები, ფილმები, ამბები და მწვავე სოციალური თემები აღმოვაჩინოთ, რომლებიც როგორც საერთაშორისო, ისე კრიტიკულად მნიშვნელოვანი ადგილობრივი გამოცდილებების გაზიარებაში დაგვეხმარება. ამავდროულად, რა თქმა უნდა, არც პოპკულტურის სიახლეები და სახალისო, შემეცნებითი თუ საინტერესო ქვიზები მოაკლდება მკითხველს", — აცხადებს მთავარი რედაქტორი.

იმისთვის, რომ არაფერი გამოგრჩეთ, თვალი ადევნეთ On.ge-ის ფეისბუქგვერდსა და ჩვენს არხებს სხვადასხვა პლატფორმაზე.