ქართული ოცნების ერთ-ერთი ლიდერი მამუკა მდინარაძე ფიქრობს, რომ მმართველი გუნდის წევრების დამოკიდებულება და აგრესიული რიტორიკა ჟურნალისტების მიმართ "საყვედურია" ცრუ ინფორმაციის გავრცელების გამო. ასე ეხმაურება ის ომბუდსმენის განცხადებას, რომელმაც აღნიშნა, რომ თანამდებობის პირთა მხრიდან ჟურნალისტების მიმართ ცინიკური დამოკიდებულება ჩვეულ პრაქტიკად იქცა, რასაც ის კრიტიკულად აფასებს.

"ცივილიზებული სამყარო ასეთ სტანდარტს, რომ დაგაბრალოს ჟურნალისტმა ან ე.წ. ჟურნალისტმა ყველაფერი და შენ არც კი უსაყვედურო, იმიტომ, რომ შემდეგ შეიძლება სახალხო დამცველმა თქვას, რომ ეს არის ზეწოლა, ეს სტანდარტი არსად არ მუშაობს", — აცხადებს მდინარაძე.

გარდა ამისა, მდინარაძე ჟურანლისტს ეუბნება, რომ როდესაც ბინძურ ტყუილს იტყვიან, პარტიას ამაზე რეაგირება ექნება, რათა მედიის წარმომადგენლებს "ნამუსმა ოდნავ მაინც შეაწუხოთ".

"როდესაც იტყვით უბინძურეს ტყუილს, უნდა მიგითითოთ ვიღაცამ, რომ უბინძურესია ეს ტყუილი და უბინძურესია იმის კეთება, რასაც აკეთებთ", — მიმართავს მდინარაძე ჟურნალისტს, რითაც ის კახა კალაძის კალაძის რიტორიკას იმეორებს.

გუშინ, 29 სექტემბერს, თბილისის მერმა, კახა კალაძემ შეურაცხმყოფელი ტერმინოლოგიით მოიხსენია მთავარი არხის ჟურნალისტები და კითხვის პასუხად ტელეკომპანიის წარმომადგენელს უთხრა, რომ მათზე უფრო "დიდი რადიკალები" და "უბინძურესი ადამიანები" ქვეყანაში არ არსებობენ. ამ ფორმით კალაძე გამოეხმაურა ჟურნალისტის რეპლიკას მედიის დევნის, 5 ივლისისა და ევროკავშირის ოფისის წინ ქართული ოცნების აქტივისტების მობილიზების შესახებ.

ომბუდსმენი მომხდარს გამოეხმაურა და განაცხადა, რომ ეს მედიისკენ მიმართულ ძალადობრივ ფონს ახალისებს. ამ თემასთან დაკავშირებით, განცხადება გაავრცელა ჟურნალისტური ეთიკის ქარტიამაც და აღნიშნა, რომ კალაძის კომენტარები ჟურნალისტების მიმართ დემოკრატიისთვის საფრთხის შემცველია და დამახასიათებელია ავტორიტარიზმისთვის.

ეს პირველი შემთხვევა არ არის, როდესაც ქართული ოცნების ლიდერები ოპოზიციურ და კრიტიკულ მედიას თავს ესხმიან, კითხვებს არ პასუხობენ ან მათ მიმართ აგრესიულად არიან განწყობილნი. დიდი ხნის განმავლობაში ისინი საერთოდ უარს ამბობდნენ მათთან კომუნიკაციაზე, ეთერებში მისვლასა და ინდივიდუალური კომენტარების ჩაწერაზე.

მმართველი გუნდი მსგავსი დამოკიდებულების გამო არაერთხელ გააკრიტიკა მედიის საკითხებზე მომუშავე არასამთავრობო ორგანიზაციებმა. ისინი აღნიშნავდნენ, რომ ეს აძლიერებს პოლარიზაციას და ჟურნალისტებს საფრთხეს უქმნის, რადგანაც ახალისებს ძალადობრივ ჯგუფებს.