პრემიერმინისტრი, ირაკლი ღარიბაშვილი EUobserver-ის მიერ გავრცელებულ ინფორმაციას საქართველოს მოქალაქეებისთვის ევროკავშირში უვიზო მიმოსვლის შეჩერების თაობაზე ოპოზიციის ხელწერად მიიჩნევს და აღნიშნულს დეზინფორმაციას უწოდებს.

"კლასიკური მაგალითი დეზინფორმაციისა და სახელმწიფოს წინააღმდეგ მიმართული საქმიანობის, მავნებლობის, პირდაპირ უნდა ითქვას. ე.ი ერთ-ერთი მთავარი ხელშესახები პროგრესი და მიღწევა ჩვენი ხელისუფლების არის უვიზო რეჟიმი. ჩვენი მოქალაქეები დღეს თავისუფლად გადაადგილდებიან ევროპის მიმართულებით, ეს მანამდე, რა თქმა უნდა, წინა მთავრობის დროს წარმოუდგენელი იყო და ალბათ, ვერავინ ვერ იოცნებებდა ამაზე.

ჩვენ ამას მივაღწიეთ და გუშინ ვიხილეთ მორიგი, კლასიკური დეზინფორმაცია, რომ თითქოს რაღაც საფრთხე ემუქრებოდა უვიზო რეჟიმს, ეს არის მართლაც ჩვენი, სამწუხაროდ, უნდა ვთქვათ, ოპოზიციის ხელწერა და მათი სახე. რა თქმა უნდა, ეს არის ტყუილი, გუშინვე დადასტურდა ეს, მათ შორს, ევროპული ლიდერების მხრიდან, რომ არავითარი მსგავსი არ იგეგმება და არც მოხდება ეს", — განაცხადა ღარიბაშვილმა.

გუშინ, 29 სექტემბერს EUobserve-მა გაავრცელა ინფორმაცია, რომლის მიხედვითაც, არალეგალური ცხოვრებისა და თავშესაფრის უსაფუძვლო მოთხოვნების ზრდის გამო საქართველოს, უკრაინის, მოლდოვისა და დასავლეთ ბალკანეთის მოქალაქეებისთვის ევროკავშირში უვიზო მიმოსვლის შეჩერების საკითხზე დისკუსიები კვლავ წამოიჭრა. EUobserver-ის თანახმად, 27 სექტემბრით დათარიღებულ შიდა ანგარიშში აღნიშნულია, რომ ევროკავშირში ბოლო დროს უვიზო რეჟიმით ბოროტად სარგებლობის მზარდი ტენდენციით სულ უფრო მეტად არიან იმედგაცრუებულნი.

საქართველოს საგარეო საქმეთა სამინისტროს ინფორმაციით, EUobserve-ის მიერ გავრცელებულ ინფორმაციას გამოეხმაურა გერმანიის პრეზიდენტი ფრანკ-ვალტერ შტაინმაიერი და მას ფეიკ ნიუსი უწოდა. საგარეოს ცნობით, შტაინმაიერმა განაცხადა, მისთვის ამ ინფორმაციის წაკითხვა "მოულოდნელი იყო".