გირჩი — მეტი თავისუფლებამ აქცია-პერფორმანსი გამართა. პარტიის ლიდერმა, ზურაბ ჯაფარიძემ რუსთავის ვიცე-მერობის კანდიდატთან, ირაკლი კუკანიასთან ერთად კომპანია ინტერტრანსის "მონოპოლიური მდგომარეობა" და გაძვირებული ტარიფები გააპროტესტა და თბილისიდან რუსთავისკენ მგზავრები შმაქსის სამარშრუტო ტაქსით წაიყვანა.

"ამ პერფორმანსის მიზანი არის გაპროტესტება ერთ-ერთი კომპანიის მონოპოლიური მდგომარეობის, რომელიც მას მისცა რუსთავის მერიამ. ამ კომპანიას აბარია მგზავრების გადაყვანა თბილისიდან რუსთავისა და რუსთავიდან თბილისამდე. სხვა არავის არ აქვს უფლება, რომ იგივე სერვისი შესთავაზოს რუსთავის ან თბილისის მაცხოვრებლებს", — განაცხადა ჯაფარიძემ On.ge-სთან საუბრისას.

ჯაფარიძე ამბობს, რომ ეს არა მგზავრების გადაყვანის სტანდარტული პროცედურა, არამედ ტურისტული მომსახურებაა და ამიერიდან კომპანია შმაქსი თბილისი-რუსთავისა და რუსთავი-თბილისის მიმართულებით მგზავრებს 1 ლარად მოემსახურება. რაც შეეხება ირაკლი კუკანიას, მისი თქმით, არსებული მდგომარეობიდან გამოსავალი არის კონკურენცია, ამიტომ მიიღეს გადაწყვეტილება, რომ რუსთავის მიმართულებით მგზავრები ატარონ შმაქსით და მათ მოემსახურონ ისე, როგორც ტურისტებს.