ცნობილი თეორიული ფიზიკოსი სტივენ ჰოკინგი კოსმოსში გაემგზავრება, ამის შესახებ მან ITV-ს გადაცემა Good Morning Britain-ში, პირს მორგანთან ინტერვიუს დროს განაცხადა.

"ჩემი ყველაზე დიდი ამბიცია კოსმოსში გაფრენა იყო და ყოველთვის მეგონა, რომ არავინ წამიყვანდა იქ, მაგრამ რიჩარდ ბრენსონმა Vigin Galactic-ით გაფრენა შემომთავაზა და მეც მაშინვე დავთანხმდი," განაცხადა მან.

სტივენ ჰოკინგი კოსმოსში პირველად გაფრინდება, თუმცა 2007 წელს მან სპეციალურად მოდიფიცირებული ბოინგით ნულოვანი გრავიტაციის პირობებში იფრინა.

ვირჯინ გალაქტიკით კოსმოსში გაფრენა $250 ათასი ღირს, მაგრამ სტივენ ჰოკინგისთვის ეს მოგზაურობა უფასო იქნება. ხომალდის პირველი ფრენა 2017 წლის ბოლოს იგეგმება. ვირჯინ გალაქტიკით დედამიწის გარეთ ფრენის რიგში ამჟამად 700 ადამიანი დგას.