ყაზბეგში ქართული ოცნების მერობის კანდიდატმა, შალვა ელოშვილმა პარტია დატოვა. მისი განცხადებით, თვითმართველობის არჩევნებზე ქართული ოცნების კანდიდატი აღარ იქნება.

ელოშვილი ამბობს, რომ პარტიის შიგნით არიან ადამიანები, რომლებიც "უპატიოსნო გზით, დეზინფორმაციით" ებძვიან გუნდის ძველ წევრებს. მისივე თქმით, გამოჩნდა, რომ მოხევეების მხარდაჭერა მმართველი გუნდისთვის ღირებული აღარაა.

"ამ პერიოდში ჩვენი გუნდის მუშაობის ერთადერთი ფასეული შედეგი მოსახლეობის მხარდაჭერა და სიყვარულია, რაც ყველაზე ძვირფასია ჩემთვის. სწორედ ამან გადამაწყვეტინა, რომ 4 წლის შემდეგ საკუთარ თავზე კვლავ ამეღო მუნიციპალიტეტზე ზრუნვის ვალდებულება.

სამწუხაროდ, მალევე გამოიკვეთა, რომ ქართული ოცნებისთვის ასეთივე ღირებული აღარაა არც მოხევეების მხარდაჭერა და არც გუნდი, რომელმაც 2012 წელს თავი გადადო გამარჯვებისთვის. პოლიტიკური გაერთიანების შიგნით აღმოჩდნენ ადამიანები, რომლებიც, რბილად რომ ვთქვათ, უპატიოსნო გზით, დეზინფორმაციის გავრცელებით, სიცრუით იბრძვიან ძალაუფლებისთვის და ებრძვიან გუნდის ძველ წევრებს. ჩვენ არ ვიცით, ამის შესახებ ფლობს თუ არა ზუსტ ინფორმაციას პარტიის მმართველი რგოლი, მაგრამ ფაქტია, რომ სწორედ მსგავსი დეზინფორმაციის წყალობით, ქართული ოცნების ხედვა თანდათან დაშორდა მოსახლეობის ხედვას იმასთან დაკავშირებით, თუ რა უნდა გაკეთებულიყო, რა უნდა გაკეთდეს და რა ვერ გაკეთდა ამ ხნის განმავლობაში მუნიციპალიტეტში",— წერია მის განცხადებაში.

ელოშვილი ამბობს, რომ ამ პირობებში ის და მისი გუნდი აღარ დარჩებიან პარტიაში და ბრძოლას გააგრძელებენ ხევის სახელით.

"ჩვენი ინტერესი, როგორც ეს ხშირად ხდება, არასოდეს ყოფილა პრივილეგიების მოპოვება. ჩვენთვის თანამდებობა, მისი ნამდვილი მნიშვნელობით, მხოლოდ და მხოლოდ მოვალეობა იყო და ასე დარჩება ყოველთვის. როგორც ჩანს, ეს ინტერესი წინააღმდეგობაში მოდის სხვის სხვაგვარ ინტერესებთან, რაც არ ტოვებს ჯანსაღი თანამშრომლობის შესაძლებლობას", — აცხადებს ის.

ელოშვილი კანდიდატად დაახლოებით 20 დღის წინ, 30 ივლისს წარადგინეს.