პროექტი Vin Vin Aris, რომელიც 2020 წელს შეიქმნა და ფეისბუქზე ყალბი ანგარიშების აღმოჩენას ემსახურება, წერს, რომ სოციალურ ქსელში საეჭვო პროფილები მომრავლდნენ. ამის შესახებ ვინ ვინ არის ფეისბუქგვერდზე წერს.

პოსტში ვკითხულობთ, რომ თუკი აქამდე ყალბი ანგარიშების ძირითადი საქმიანობა ახალი ამბების სააგენტოს ფეისბუქგვერდებზე პროსახელისუფლებო უმრავლესობის ილუზიის შექმნა იყო, Vin Vin Aris მიიჩნევს, რომ ამჯერად მათი ძირითადი მიზანი ოპოზიციურ ე.წ. ბაბლში შეპარვაა.

"გამოირჩევიან ოპოზიციური მესიჯბოქსით, პროფილის ფოტოებზე შესაბამისი ჩარჩოებით და "კლასიკური" ბოტებისგან განსხვავებით, მათ პროფილზე გაცილებით უფრო მაღალი და დახვეწილი აქტიურობით (სტატუსები, სტატიები, სიმღერები, ვიდეოები, სთორები და ა.შ.) ქმნიან რეალურობის ილუზიას".

Vin Vin Aris ფეისბუქის მომხმარებლებს სიფრთხილისკენ მოუწოდებს და ურჩევს, რომ თუკი საერთო მეგობრების გამო უცხო პროფილებს მეგობრების სიაში აქამდე უპრობლემოდ ამატებდნენ, "ალბათ ვინმე ჩვენიანია" პრინციპით, ახლა ნაკლებად ენდონ უცხო ანგარიშებს.

"უმრავლესობას ურჩევნია, რომ მეგობრების ჯგუფისთვის განკუთვნილი არასაჯარო სტატუსები და კომენტარები სადღაც გაურკვეველ სახელისუფლებო "კანტორაში" არ ხვდებოდეს მათ ციფრულ აქტიურობაზე დოსიეს შექმნისა თუ სენტიმენტების ანალიზის მიზნით".

Vin Vin Aris-მა ბოლო პერიოდში რამდენიმე საეჭვო პროფილის შესახებ უკვე გამოაქვეყნა პოსტები.

ფოტო: Vin Vin Aris

მათი დიდი ნაწილი უცხოელი მომხმარებლების ფოტომასალას ინსტაგრამიდან, გუგლიდან ან სხვა სოციალური ქსელებიდან იპარავს და შემდეგ ქართული სახელი და გვარით ყალბ ანგარიშს ქმნის.

ფოტო: Vin Vin Aris

Vin Vin Aris ასევე მოუწოდებს ფეისბუქმომხმარებლებს, რომ საეჭვო ანგარიშების აღმოჩენის შესახებ ფეისბუქის საშუალებით მათაც შეატყობინონ.

ფოტო: Vin Vin Aris

Vin Vin Aris წერს, რომ გამოაშკარავებული ანგარიშები შეგროვებული მეგობრების სია რომ არ დაკარგონ, ან რომ არ დარეპორტდნენ, დროებით ფეისბუქს აუქმებენ. თუმცა, თუ ამ ანგარიშებიდან რომელიმე მეგობრებში გყავდათ, მათი მოძებნა თქვენი მეგობრების სიაში და დეაქტივირებული ანგარიშის წაშლა ისევ შეგიძლიათ.

ფოტო: Vin Vin Aris

ქრომის გაფართოების გადმოსაწერად ეწვიეთ Vin Vin Aris-ის ოფიციალურ საიტს.

ბოლო რამდენიმე წელია, Facebook იკვლევს კოორდინირებულ არაავთენტურ ქცევას და მსგავს ქსელებს საკუთარი პლატფორმიდან შლის.

ასევე იხილეთ:

თუ გინდა, რომ ნამდვილი და ყალბი ამბები ერთმანეთისგან მარტივად განასხვავო და დეზინფორმაციისგან სხვებიც დაიცვა, შემოგვიერთდი ჯგუფში – ერთად ვებრძოლოთ დეზინფორმაციას.