ივნისში მედიაში გავრცელდა ინფორმაცია, რომ სამხრეთაფრიკელმა ქალმა, გოშამე თამარა სითოულმა 10 ტყუპი — 7 ბიჭი და 3 გოგო გააჩინა. ამის შესახებ სტატია პირველად Pretoria News-მა გამოაქვეყნა. თუმცა ოფიციალურმა გამოძიებამ დაადგინა, რომ ეს ამბავი სიმართლეს არ შეესაბამება.

ადგილობრივი ხელისუფლების განცხადებით, გუტენგის პროვინციის არც ერთ საავადმყოფოში არ იძებნება ინფორმაცია, რომელიც 10 ტყუპის დაბადებას დაადასტურებდა. ამასთანავე, სამედიცინო ტესტის მიხედვით, გოშამე თამარა სითოული ორსულადაც არ ყოფილა. 37 წლის ქალი ამჟამად ფსიქიატრების დაკვირვების ქვეშ იმყოფება.

კომპანია Independent Online (IOL), რომელიც Pretoria News-ს, ინფორმაციის გამავრცელებელ მედიასაშუალებას ფლობს, ამტკიცებს, რომ ისტორია სინამდვილეს შეესაბამება. მათი მტკიცებით, ქალმა 10 ბავშვი 7 ივნისს პრეტორიის ერთ-ერთ საავადმყოფოში გააჩინა, თუმცა სამედიცინო პერსონალი სათანადოდ მომზადებული არ იყო და აღნიშნული ბრალდებებიც მხოლოდ მათი გულგრილობის დაფარვას ემსახურება.

ადგილობრივი ხელისუფლების მიხედვით, კომპანიისა და Pretoria News-ის მთავარი რედაქტორის, პიეტ რამპედის წინააღმდეგ სამართლებრივ ზომებს მიიღებენ.

კომპანიის მტკიცებით, რედაქტორი და წყვილი ერთსა და იმავე ტაძარში დადიოდნენ და რედაქტორმა მათგან ინტერვიუ მაისში აიღო. Pretoria News-მა ბავშვების დაბადების შესახებ სტატია 8 ივნისს გამოაქვეყნა და წყაროდ ბავშვების მამა დაასახელა, რომელმაც თავად ახალი ამბავი საკუთარი პარტნიორისგან ტექსტური შეტყობინების სახით მიიღო. კოვიდრეგულაციების გამო თავად მამას სამედიცინო დაწესებულებაში შესვლა აკრძალული ჰქონდა. საბოლოოდ, ინფორმაციის გავრცელებისას რედაქტორი შეტყობინებებს ისე დაეყრდნო, რომ სამედიცინო დაწესებულებისგან დასტური არ მიუღია.

აღსანიშნავია, რომ თავდაპირველად 10 ტყუპის გაჩენის ისტორია ადგილობრივი ხელისუფლების წარმომადგენელმაც დაადასტურა, რის შემდეგაც ამბავი მსოფლიოს მედიასაშუალებებმაც გააშუქეს. თუმცა მოგვიანებით დადგინდა, რომ აღნიშნული განცხადებაც მხოლოდ ოჯახის ინფორმაციას ეყრდნობოდა.

მალე მედიასაშუალებებმა იმ სამედიცინო დაწესებულების ძებნა დაიწყეს, სადაც, ქალის მტკიცებით, 10 ტყუპი გაჩნდა, თუმცა უშედეგოდ. ამის შემდეგ ქალის პარტნიორმა განაცხადა, რომ გოშამე თამარა სითოული დაიკარგა და ხალხს მის ანგარიშზე ფულის გადარიცხვისგან თავის შეკავება სთხოვა. აღსანიშნავია, რომ 10 ტყუპის გაჩენის შემდეგ ქალის ანგარიშზე, სულ მცირე, $70 000-ია შეგროვებული.