შეიძლება, რომელიმე სიმღერა დიდი ხნის განმავლობაში გქონდეთ აკვიატებული, მაგრამ არც კი იცოდეთ, რომ ის არა ორიგინალი ვერსია, არამედ ქავერია.

დიახ, ხანდახან ისეც ხდება, რომ მსმენელების დიდ ნაწილს თავდაპირველი შემსრულებლის ნამღერზე მეტად სულ სხვა მუსიკოსის ვერსია უყვარდება.

ამ სტატიაში რამდენიმე ყველაზე ცნობილი მაგალითია წარმოდგენილი, რომელთა ორიგინალი ჩანაწერები ხშირად მსმენელების ნაკლებობას არ უჩივის, თუმცა პოპულარობით მაინც ქავერები სჯობნის ხოლმე.

1. ჯიმი ჰენდრიქსი — All Along the Watchtower

ეს ბობ დილანის 1967 წლის ალბომის John Wesley Harding ერთ-ერთი სიმღერაა, თუმცა ყველაზე კარგად მას მაინც ჰენდრიქსისეული ქავერით იცნობენ.

2. არეტა ფრანკლინი — Respect

ბევრი არეტა ფრანკლინს სწორედ ამ სიმღერით იცნობს, თუმცა ის მას სულაც არ ეკუთვნის: Respect პირველად 1965 წელს სოულის კაცმა შემსრულებელმა ოტის რედინგმა ჩაწერა.

3. The Beatles — Twist & Shout

ეს ცნობილი სიმღერა ჯგუფ The Top Notes-ს ეკუთვნის: 1961 წელს დაიწერა, ორი წლის შემდეგ კი ბიტლსმა დააქავერა.

4. Soft Cell — Tainted Love

ეს სიმღერა გლორია ჯონსმა ჩაწერა 1964 წელს, მაგრამ მას უმეტესობა Soft Cell-ის ვერსიით იცნობს. ასევე არანაკლებ პოპულარულია მერლინ მენსონის ვერსიაც.

5. ჯონი კეში — Hurt

ჯონი კეშის ეს სევდიანი ბალადა ამერიკული როკჯგუფის Nine Inch Nails ამავე სახელწოდების მქონე სიმღერის ქავერია.

6. შინეიდ ო'კონორი — Nothing Compares 2U

სიმღერა, რომლითაც ირლანდიელი შინეიდ ო'კონორი მთელმა მსოფლიომ გაიცნო, პრინსმა დაწერა 1985 წელს.

7. ჯეფ ბაკლი — Hallelujah

ლეონარდ კოენის ამ სიმღერის უამრავი ქავერი არსებობს, თუმცა მათ შორის ყველაზე პოპულარული შესრულება, ალბათ, ჯეფ ბაკლის ეკუთვნის.

8. ემი უაინჰაუსი — Valerie

ემი უიანჰაუსის ერთ-ერთი ყველაზე ცნობილი შესრულება, სინამდვილეში, ბრიტანული ბენდის The Zutons სიმღერის ქავერია.

9. უიტნი ჰიუსტონი — I Will Always Love You

ყველა დროის ერთ-ერთი ყველაზე ცნობილი სასიყვარულო სიმღერა, რომელსაც უიტნი ჰიუსტონის შესრულებით ვიცნობთ, დოლი პარტონს ეკუთვნის.

10. კრისტინა აგილერა, ლილ კიმი, მაია, პინკი — Lady Marmalade

2000-იანების ეს ერთ-ერთი ყველაზე დიდი ჰიტი პირველად ამერიკულმა ჯგუფმა Labelle ჩაწერა 1974 წელს.

11. გარი ჯულსი — Mad World

ამ სიმღერის ორიგინალი ვერსია ბრიტანულ ბენდს Tears for Fears ეკუთვნის. გარი ჯულსის ქავერი და თავდაპირველი შესრულება ერთმანეთისგან ცა და დედამიწასავით განსხვავდება.

12. Nirvana — The Man Who Sold The World

მართალია, ამ სიმღერის ორიგინალ ვერსიას, რომელსაც დევიდ ბოუი ასრულებს, ბევრი კარგად იცნობს, თუმცა მაინც ნირვანას ქავერი უფრო ბევრმა შეიყვარა.

13. ბიორკი — It's Oh So Quiet

ბიორკის მსმენელებისთვის კარგად ნაცნობი ეს შესრულება ამერიკელი მომღერლის ბეტი ჰატონის 1951 წლის სიმღერის ქავერია.

14. Fugees — Killing Me Softly With His Song

თავდაპირველად ეს სიმღერა 1972 წელს ლორი ლიბერმანისთვის დაიწერა, თუმცა ამ ვერსიამ პოპულარობა ვერ მოიპოვა და ჩარტებში მხოლოდ 1973 წელს რობერტა ფლეკის შესრულება მოხვდა. 1996 წელს კი ჰიპ-ჰოპ ჯგუფმა Fugees მას ახალი სიცოცხლე შთაბერა.

15. ტინა ტერნერი — Proud Mary

1971 წელს ტინა ტერნერმა თავის მეუღლესთან და მუსიკალურ პარტნიორთან ერთად, აიკ ტერნერთან ჩაწერა ეს ცნობილი სიმღერა, რომელიც თავდაპირველად, 1968 წელს ამერიკული ჯგუფისთვის Creedence Clearwater Revival დაიწერა.

ბონუსი: The Animals — The House Of The Rising Sun

გასული საუკუნის 60-იანების ეს ერთ-ერთი ყველაზე დიდი ჰიტი ტრადიციული ხალხური სიმღერაა, რომელიც პირველად 1930-ანებში ჩაიწერეს აპალაჩში.