78 წლის ვივიენ კამინგემმა, რომელიც ბებია და უკვე დიდი ბებიაცაა, ცოტა ხნის წინ ალაბამას შტატში მდებარე სემფორდის უნივერსიტეტი დაამთავრა.

"აღფრთოვანებული ვიყავი, თავი შესანიშნავად ვიგრძენი", — იხსენებს კამინგემი, — "მხოლოდ იმის თქმა შემიძლია, რომ სიხარულისგან ფრთები გამომესხა. განათლების მიღების პროცესი სასიამოვნო შეგრძნებაა".

ფოტო: ABC

კამინგემი, რომელიც 1960-იან წლებში ორი მცირეწლოვანი შვილის მარტოხელა დედა იყო, იმხანად ჯერ ზედამხედველად, შემდეგ კი ერთ-ერთი კომპანიის წერილების მიმღებ განყოფილებაში მუშაობდა. წლების განმავლობაში, ბავშვების გაზრდასთან ერთად, მან ნაბიჯ-ნაბიჯ დაიწყო განათლების მიღება.

1992 წელს, სამსახურისთვის თავის დანებების შემდეგ, კამინგემი სემფორდის უნივერსიტეტის სტუდენტი გახდა და სულ ახლახან თავისუფალი მეცნიერებების ბაკალავრის ხარისხის მოპოვებაც შეძლო.

გამოსაშვებ ცერემონიას, სადაც 78 წლის კურსდამთავრებულმა დამსახურებული დიპლომი მიიღო, მისი შვილები, 58 წლის დონალდი და 54 წლის ტარა ესწრებოდნენ.

ახლა უკვე ბაკალავრი კამინგემი სწავლის გაგრძელებას სამაგისტრო საფეხურზე გეგმავს.

"მსურს, ყველას ვუთხრა, რომ თუკი რამე ოცნება გაქვთ და ამ ოცნებით გატაცებული ხართ, აუცილებლად მიჰყევით მას", — ამბობს ვივიენი, — "არავის მისცეთ უფლება, გითხრათ, რომ მიზანს ვერ მიაღწევთ".