კემბრიჯის ჰერცოგსა და ჰერცოგინიას ამიერიდან თვალი შეგიძლიათ, მათ იუთუბ არხზე ადევნოთ. იუთუბზე დებიუტისთვის მათ მოკლე პრომო ვიდეო შეარჩიეს, რომელიც პრინცი უილიამისა და ქეით მიდლტონის სამუშაოსა და ყოველდღიურობის მცირე მიმოხილვას წარმოადგენს.

"ფრთხილად იყავი საუბრისას, რადგან ეს ხალხი ყველაფერს იღებს", — ვიდეო პრინცი უილიამის ხუმრობით იწყება.

მოკლე ვიდეოში შეგიძლიათ, წყვილი სხვადასხვა სიტუაციაში იხილოთ: საქმიანი პრინცი უილიამი სამზარეულოში ტრიალებს, ქეით მიდლტონი კი ხან მშვილდოსნობის დაუფლებას, ხანაც — ცხვრის გაპარსვას ცდილობს. მომავალში პრინცი უილიამი და ქეით მიდლტონი მაყურებლებს იუთუბ არხზე ექსკლუზიურ ვიდეოებს შესთავაზებენ.

აღსანიშნავია, რომ პრინცი უილიამი და ქეითი სამეფო ოჯახიდან იუთუბზე პირველები ნამდვილად არ არიან. 2007 წელს დედოფალმა პლატფორმაზე საკუთარი არხი შექმნა, რომლის მიზანიც ბრიტანული მონარქიის პოპულარიზაცია იყო. როგორც აღმოჩნდა, იუთუბის მუშაობის პრინციპი დედოფალს შვილიშვილებმა აუხსნეს.