18 აპრილს Facebook-ზე ახალი გვერდი, სახელად დაიკარგა ძაღლი გამოჩნდა, რომელმაც სევდიანი ამბავი გვამცნო: პატრონმა ერთგული ოთხფეხა მეგობარი დაკარგა და მის დასაბრუნებლად დახმარებას საზოგადოებას სთხოვდა.

პატრონმა აღმოაჩინა, რომ მისი უსაყვარლესი ჩალისფერი მეგობარი მშობლიური ქუჩიდან მუნიციპალურ თავშესაფარში გადაიყვანეს, საიდანაც ძაღლი მაშინვე გაიქცა.

"11 აპრილს, გამთენიისას, ტრანკვილიზატორი ესროლეს და დაძინებული წაიყვანეს სრულიად უცხო გარემოში. ძაღლი, რომელიც თავის ქუჩას არ გამცდარა, სადაც დედა და დასთან ერთად იზრდებოდა. წაიყვანეს და კარის დაკეტვა დაავიწყდათ..." — წერს პატრონი.

ძაღლმა სახლის გზა არ იცოდა, ამიტომ პატრონი ღელავდა, რომ ერთგული მეგობარი შინ დამოუკიდებლად ვერ დაბრუნდებოდა. პატრონმა ძაღლის დეტალურ აღწერასთან ერთად მპოვნელისთვის ფულადი ჯილდოც დააწესა.

საბედნიეროდ, დღეს ფეისბუქ გვერდზე გავრცელდა ინფორმაცია, რომ 17-დღიანი ძებნის შემდეგ, დაკარგულმა ძაღლმა სახლის გზას თავად მოაგნო და პატრონი და ოჯახის წევრები უზომოდ გაახარა.

"დაბრუნდა! თავისით დაბრუნდა! 17 დღე-ღამე ეძებდა გზას ორხევიდან ვერის პატარა ქუჩამდე. 17 საშინელი დღე გამოვიარეთ მთელმა ოჯახმა...გაუბედურებული, გამხდარი და დასტრესილი, მაგრამ დაბრუნდა!"

ზუსტად არავინ იცის, რამდენი სირთულე გადაიტანა შინ დასაბრუნებლად მამაცმა ცუგამ, თუმცა მთავარია, რომ მყუდრო სახლსა და მზრუნველ ადამიანებს უკვე დაუბრუნდა!