ამერიკის ფედერალურმა საარჩევნო კომპანიამ ანგარიში გამოაქვეყნა, რომელშიც ჩანს, რომ ამერიკელმა რეპერმა და პრეზიდენტობის კანდიდატმა, კანიე ვესტმა კამპანიაში ჯამში $13,2 მილიონი დახარჯა. აქედან თითქმის $12,5 მილიონი საკუთარი ქონებიდან გაიღო.

ანგარიშის მიხედვით, კანიემ The New York Times-ზე გამოქვეყნებულ 2-გვერდიან რეკლამაში $210 544 დახარჯა, ხოლო არჩევნების დღეს — $918 130.

43 წლის რეპერმა 4 ივლისს საპრეზიდენტო კანდიდატად თავი წარადგინა, მაშინ, როცა აშშ-ის რამდენიმე შტატში კენჭისყრაში მონაწილეობის დედლაინები უკვე ამოწურული იყო. კანიეს საპრეზიდენტო კამპანიის იდეები კონერვატიულ შეხედულებებზე იყო აგებული. ის ვაქცინების მოწინააღმდეგედაც მოგვევლინა, როცა თქვა, რომ ვაქცინის ნაცვლად ლოცვის სჯეროდა:

"ყველაფერი ღმერთის ხელშია. უნდა შევწყვიტოთ იმის კეთება, რაც ღმერთს აღიზიანებს. უამრავი ბავშვი ვაქცინის შედეგად პარალიზდება. როცა ამბობენ, რომ კორონავირუსს ვაქცინა დაამარცხებს, უკიდურესად ფრთხილი ვხდები. ეს ხომ მხეცის ნიშანია. მათ სურთ, რომ ჩვენში ჩიპები მოათავსონ და ისეთი რამ გააკეთონ, რაც შემდეგ სამოთხის გალავანის გადაკვეთაში ხელს შეგვიშლის. ვწუხვარ, როცა ვამბობ, რომ ადამიანებში ეშმაკი ბუდობს და მართლა გული მწყდება, როცა ვაანალიზებ, რომ სამოთხეში ბევრი ადამიანისთვის არაა ადგილი".

უცნაურია, რომ ამ განცხადებების მიუხედავად, კანიეს არჩევნებში დეკადის ერთ-ერთი მოწინავე მეცნიერი, ილონ მასკი მხარს უჭერდა და ვესტის საარჩევნო კამპანიის მრჩეველიც იყო.

4 ნოემბერს, კანიე ვესტმა 43 წლის ასაკში ამერიკის საპრეზიდენტო არჩევნებში ხმა პირველად მისცა და ისიც საკუთარ თავს. რეპერმა და პრეზიდენტობის კანდიდატმა განაცხადა, რომ 2020 წლის მარათონში ხმის მიცემის დროს არჩევანი საკუთარ კანდიდატურაზე შეაჩერა:

"ღმერთი დიადია. დღეს ჩემს ცხოვრებაში პირველად მივეცი ხმა ამერიკის შეერთებული შტატების პრეზიდენტობის კანდიდატს და ეს ის ადამიანია, ვისაც ბოლომდე ვენდობი — ჩემი თავი".

დღის ბოლოს, კანიემ ამერიკის საპრეზიდენტო არჩევნებში დამარცხება აღიარა, თუმცა არჩევნებში 2024 წელს მონაწილეობაც დააანონსა. მან საერთო ხმებიდან მხოლოდ 66 ათასი ხმის მოგროვება შეძლო.