ფლორიდის ერთ-ერთი ოლქის ჯანდაცვის დეპარტამენტის განცხადებით, ორი ქალი კორონავირუსის ვაქცინის ხელმეორედ მიღებას "ბებიებად" გადაცმული ცდილობდა.

ვაქცინაციის დაწესებულებაში განმეორებით ასაცრელად 44 და 34 წლის ქალები თავსაბურავებით, ხელთათმანებითა და სათვალეებით გამოცხადდნენ. მიზეზი, სავარაუდოდ, შტატში არსებული ვაქცინაციის გეგმაა, რომელიც უპირატესობას 65 წელს ზემოთ მყოფ პირებს ანიჭებს.

როგორც აღმოჩნდა, ორივე მათგანს ვაქცინის პირველი მიღების დამადასტურებელი ცნობა ჰქონდა, თუმცა მეორედ აცრაზე უარი პირადობის მოწმობასთან დაკავშირებული პრობლემების გამო ეთქვათ.

მას შემდეგ, რაც ჯანდაცვის დეპარტამენტის წარმომადგენლებმა აღმოაჩინეს, რომ პირადობის მოწმობაში მითითებული დაბადების თარიღი არ ემთხვეოდა რეგისტრაციის დროს აღნიშნულს, ისინი პოლიციის განყოფილებას დაუკავშირდნენ.

ჯანდაცვის სფეროს წარმომადგენლების თქმით, ამ ინციდენტის შემდეგ უსაფრთხოების ზომები გამკაცრდება, რადგან არსებული რესურსები და ფინანსები შეზღუდულია, განსაკუთრებით, ზამთრის პერიოდში.