მეუფე ვახტანგის განცხადებით, ყარაბაღის ომის მიმდინარეობისას დავით გარეჯის მოთხოვნის დრო და ჟამი არ იყო. მისი თქმით, მართალია ეს მტკივნეული თემაა, თუმცა საკითხის გადასაწყვეტად "მშვიდობიანობის ჟამს" უნდა ემუშავათ. ამის შესახებ მან TV პირველის ეთერში ისაუბრა.

"როდესაც აწარმოებს ჩვენი მეგობარი და მეზობელი სახელმწიფო ომს, ისევ თავის მეზობელ სახელმწიფოსთან, ამ დროს ამ განცხადების გაკეთება ასეთნაირად — ტერიტორია, სადაც გადის საზღვარი დავუშათ ორ მეზობელს შორის, მტკივნეული საკითხია ნამდვილად, მაგრამ ამის მოთხოვნის დრო და ჟამი ნამდვილად არ იყო. ყველა ნათელის გონების ადამიანი იტყვის, რომ რა დროს ამის მოთხოვნაა? ეს გამოიწვევდა ჩვენს დაპირისპირებას შეიძლება მათთან და ჩვენ დავზარალდებოდით ისევ. ამით საქმე არ გაკეთდებოდა", — განაცხადა მან.

დღეს საპატრიარქოში, თითქმის 1 წლიანი პაუზის შემდეგ, სინოდის სხდომა ჩატარდა. მიუხედავად იმისა, რომ სინოდის განჩინება დღეს არ გამოქვეყნდება, სასულიერო პირებმა უკვე განაცხადეს, რომ სინოდზე 10-მდე საკითხი განიხილეს, მათ შორის, გარეჯი, ვაქცინაცია და "ეკლესიაზე შეტევა".

კარტოგრაფების საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

21 იანვარს პროკურატურამ ივერი მელაშვილის კაბინეტში ფარულად გადაღებული ვიდეომასალა გამოაქვეყნა, სადაც ბრალდებულისა და კიდევ ერთი პირის საუბარია აღბეჭდილი. პროკურორ ამირან გულუაშვილის მტკიცებით, ფარულ ჩანაწერებში ბრალდებული ივერი მელაშვილი ადასტურებს, რომ 2006 წლის აგვისტოს შეთანხმებისას დავით გარეჯის მიმდებარედ ქართულმა მხარემ საქართველოს თავდაპირველი პოზიცია უარყო.

გაიგეთ მეტი: