საპარლამენტო უმრავლესობის ერთ-ერთი ლიდერის, ბექა დავითულიანის განცხადებით, ბიძინა ივანიშვილის ჭარბი ავტორიტეტი პოლიტიკურ სივრცეში არაკონკურენტულ გარემოს ქმნიდა. პალიტრანიუსის ეთერში დავითულიანმა განაცხადა, რომ პოლიტიკიდან წასვლით ივანიშვილმა ქართულ ოცნებას ეს ავტორიტეტი გამოაცალა და ჯანსაღი კონკურენციის პირობები შექმნა.

"მისი ჭარბი ავტორიტეტი და ჭარბი რესურსები არაკონკურენტულ მდგომარეობას აყენებს, ხო?! რეალურად რომ ვთქვათ, ჩვენც, მმართველი გუნდი ვართ და ჩვენთვის, რეალურად, ფუფუნება იყო ამ ადამიანის ლიდერობა. იმიტომ, რომ რეალურად მას ჰქონდა დიდი ავტორიტეტი, დიდი რესურსები და დიდი შესაძლებლობები ბევრი სხვა მიმართულებით. შესაბამისად, მმართველი გუდის სხვა ლიდერებს და წევრებს იმდენი ბრძოლა არ უწევდათ ხო, რეალურად, ხელისუფლების მოპოვებისთვის. ამ ადამიანმა გამოაცალა ახლა ეს და თქვა — მორჩა, ჯანსაღი კონკურენციის პირობებს ვაყენებ, რაც გრძელ ვადაში დემოკრატიის განვითარებისთვის არის ბევრად უკეთესი", — განაცხადა ბექა დავითულიანმა.

პოლიტიკაში მეორედ მოსვლის შემდეგ ქართული ოცნების თავმჯდომარე, ბიძინა ივანიშვილი ამბობს, რომ პოლიტიკიდან მეორედ მიდის. ამის შესახებ მან ფეისბუქში გამოქვეყნებულ საჯარო წერილში განაცხადა. მმართველი პარტიის ყრილობა შაბათს, 16 იანვარს გაიმართება, სადაც ქართული ოცნების ახალ თავმჯდომარეს აირჩევენ. პარტიამ ამ პოსტზე ირაკლი კობახიძის კანდიდატურა წარადგინა.

გაიგეთ მეტი: