ქართული ოცნების აღმასრულებელი მდივნის, ირაკლი კობახიძის განცხადებით, სანამ მანდატები გაუქმდება, ჯერ აქვთ გარკვეული დრო იმისთვის, რომ ოპოზიციასთან მოლაპარაკებების მაგიდასთან კვლავ დასხდნენ. ამის შესახებ მან პალიტრანიუსის ეთერში ისაუბრა.

"შეიძლება ის პარტიების ვიხილოთ მოლაპარაკებების მაგიდასთან, რომლებმაც დაწერეს ეს განცხადებები, ამას არ გამოვრიცხავთ. არის გარკვეული დრო დარჩენილი, ზოგიერთ შემთხვევაში 10 დღე, ზოგიერთ შემთხვევაში 2 კვირა. ანუ ვიდრე არ არის გაუქმებული მანდატები კონკრეტული პარტიებისთვის, მანამდე შეიძლება მათთან ერთად მოლაპარაკებების მაგიდასთან დაჯდომა. რომ იყოს უკვე გაუქმებული და ვიყოთ 2 კვირის თავზე დღეიდან, არ ექნებოდა აზრი", — განაცხადა მან.

ოპოზიციურმა პოლიტიკურმა პარტიებმა მანდატების გაუქმების თაობაზე ცენტრალურ საარჩევნო კომისიას უკვე მიმართეს. 31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია.