ნაციონალური მოძრაობის ერთ-ერთი ლიდერის, ზაალ უდუმაშვილის თქმით, სირცხვილის დერეფნებთან დაკავშირებით სხვადასხვა აზრი არსებობს, თუმცა ამაში არა ტრადიციული გაგებით სირცხვილის დერეფანი, არამედ მდუმარე აქციები იგულისხმება.

"აქ ნაგულისხმევია მდუმარე აქციები საარჩევნო უბნებთან, ისაც გარკვეულ საარჩევნო უბნებთან. შედგება თუ არა ეს, ესე ჯერ არ არის. დღეს ჩვენ შევჯერდებით. მივიღებთ იმ გადაწყვეტილებას, რომელიც მისაღები იქნება ყველა პარტიისთვის აბსოლუტურად. ჩვენი მთავარი ამოცანა ეს არის, რომ ვიმოქმედოთ ერთიანი გეგმით. როგორც ჩამოვყალიბდებით, აქციის რა ფორმაზე ჩამოვყალიბდებით ამას რამდენიმე საათში გეტყვით", — განაცხადა უდუმაშვილმა.

15 ნოემბერს ბათუმში გამართულ საპროტესტო აქციაზე ნაციონალური მოძრაობის წევრმა, ლევან ვარშალომიძემ მხარდამჭერებს მოუწოდა, რომ 21 ნოემბერს საარჩევნო უბნებთან სირცხვილის დერეფნები გააკეთონ. მისი ეს პოზიცია გააკრიტიკეს პარტიის ლიდერებმა, ხატია დეკანოიძემ და სალომე სამადაშვილმა. ამ იდეას არ იზიარებენ არც ოპოზიციურ ერთობაში შემავალი სხვა პარტიები. მოგვიანებით, ენმ-ის ბათუმის ორგანიზაციაში განმარტეს, რომ "სირცხვილის კორიდორი იქნება მხოლოდ მაღალი თანამდებობის პირებისთვის და არა ამომრჩევლებითვის".