ნაციონალური მოძრაობის წევრი, ზაალ უდუმაშვილი ამბობს, რომ აქციებზე "მიშა ჩამოდი" ბანერების მხარდამჭერებისთვის დარიგება მათი დაორგანიზებული არაა. მისივე თქმით, ამის ორგანიზება რომ დასჭირდეთ, ბევრად ეფექტურად გააკეთებენ.

"ასეთი რაღაცები კეთდება კონკრეტული ადამიანების ინდივიდუალური გადაწყვეტილებით, ეს არ არის პარტიის მიერ დაორგანიზებული ხალხი. ადამიანი, რომელიც თავად გადაწყვეტს, რაღაც ბანერი აწიოს, იმას ჩვენ საჯაროდ ვერ გავკიცხავთ და ვერ დავუშლით აქციაზე ყოფნას. მეორეა, ჩვენ რომ გვჭირდებოდეს მსგავსი რაღაცის დაორგანიზება, ბევრად უფრო ეფექტურად გავაკეთებდით ამას", — განაცხადა უდუმაშვილმა.

"მიშა ჩამოდი" ბანერების გამო ბათუმში საპროტესტო აქცია პარტიებმა, ლელომ და მოქალაქეებმა დატოვეს.

ლელოს ერთ-ერთმა ლიდერმა, ბადრი ჯაფარიძემ განაცხადა, რომ ლოზუნგები, რომელიც არ ეხება ოპოზიციის საერთო მოთხოვნას ხელახალი არჩევნების ჩატარებასთან დაკავშირებით, ამომრჩეველში დაბნეულობას იწვევს.

ექსპრეზიდენტი მიხეილ სააკაშვილის განცხადებით, ლოზუნგი "არაფერი არ გამოვა, სანამ მიშა არ ჩამოვა" სუს-ისა და ბიძინა ივანიშვილის ლოზუნგებია.