YouTube Rewind — ვიდეოსტრიმინგ სერვისის ყოველწლიური ვიდეო, რომელიც წლის განმავლობაში გამორჩეულ კონტენტის შემქმნელებს, ტენდენციებსა და მომენტებს აერთიანებდა, წელს აღარ გამოვა.

კომპანიის განცხადებით, "2020 განსხვავებული წელი იყო" და "არასწორი იქნება ისე მოქცევა, თითქოს ეს ასე არ ყოფილა". ამდენად, ეს პირველი წელი იქნება 2010-ის შემდეგ, როცა იუთუბი ყოველწლიურ ვიდეოკოლაჟს არ შექმნის. მიუხედავად იმისა, რომ ბოლო წლებში ეს ვიდეო კომიკური უფრო გახდა კონტენტშექმნელებისთვის — რაზეც ის ფაქტი მოწმობს, რომ 2018-ის გასახსენებელი კოლაჟი წლის ყველაზე "არმოწონებულ" ვიდეოდ იქცა — იგი მაინც წარმოადგენს იუთუბის ტრადიციების ნაწილს. კომპანიის აღმასრულებელი დირექტორის, სიუზენ ვუჩიცკის თქმით, 2018 წლის ვიდეომ მათაც კი ცოტათი უხერხულად აგრძნობინა თავი.

"ჩვენ ვიცით, რომ 2020 წელს თქვენ ყველამ უამრავი კარგი რამ შექმენით", — ნათქვამია იუთუბის განცხადებაში, — "თქვენ იპოვეთ სხვადასხვაგვარი საშუალება, რომ ადამიანები გაგემხნევებინათ, დახმარებოდით სიტუაციასთან გამკლავებაში და მათ სახეზე ღიმილი მოგეგვარათ. ეს რთული წელი თქვენ ნამდვილად უკეთესად აქციეთ".

რადგან წლეულს ადამიანებმა დრო უმეტესად სახლში გაატარეს, იუთუბზე მომხმარებლების აქტიურობა თვალშისაცემად გაიზარდა. კომპანიის განცხადებით, მარტის მიწურულისთვის პლატფორმაზე განსაკუთრებით ნახვადი გახდა ვიდეოები, რომელთა სათაურში "ჩემთან ერთად" ფიგურირებდა — "მოემზადე ჩემთან ერთად", "იმუშავე ჩემთან ერთად", "ისწავლე ჩემთან ერთად". ფეისბუქის მსგავსად, პლატფორმაზეც პოპულარობით სარგებლობდა ვიდეოების პირდაპირ ეთერში გადაცემაც.

იუთუბს არ განუცხადებია, დაბრუნდება თუ არა ტრადიციად ქცეული ვიდეოკოლაჟი 2021 წელს. როგორც სხვა ყველაფერი, ესეც, დიდი ალბათობით, სიტუაციის სამომავლო განვითარებაზეა დამოკიდებული.