ქართული ოცნების ლიდერის, ბიძინა ივანიშვილის განცხადებით, ყველა წინასაარჩევნო კვლევა ადასტურებს, რომ ქართული საზოგადოების "უპრეცედენტო მხარდაჭერის ფონზე", პარტიის საპროგნოზო მაჩვენებელი 54-დან 60%-მდე მერყეობს, რიგ შემთხვევაში კი, 63%-საც აჭარბებს. მისი თქმით, ქართულ ოცნებას ამჟამად "ძალზე მყარი" პოზიციები აქვს და ამ არჩევნებში "დამაჯერებლად იმარჯვებს". ბიძინა ივანიშვილის განცხადება ქართულმა ოცნებამ ფეისბუქზე გაავრცელა.

"შესაბამისად, დღეს ჩვენ ყველანაირი ძალისხმევა უნდა მივმართოთ, არა დამატებითი ხმების მობილიზებისთვის, რაც ერთ ან ორ პროცენტში თუ ნახავს გამოხატულებას და არჩევნების შედეგებზე პრინციპულ გავლენას ვერ მოახდენს, არამედ ყველაფერი უნდა გაავაკეთოთ იმისათვის, რომ არჩევნები მშვიდ და სამართლიან გარემოში ჩატარდეს და მის შედეგებში ეჭვის შეტანა ვერავინ შეძლოს", — განაცხადა ივანიშვილმა.

ამასთან, ივანიშვილმა საზოგადოებას, განსაკუთრებით, პარტიის მხარდამჭერებს მოუწოდა, არ აყვნენ პროვოკაციებს, რომ "მშვიდად" მივიდნენ არჩევნებამდე და "მშვიდად" გააგრძელონ ცხოვრება საქართველოს წარმატებისთვის.