ოკუპანტი ქვეყანა საქართველოს, აშშ-ს საელჩოსა და სახელმწიფო დეპარტამენტს პროვოკაციაში ადანაშაულებს. რუსეთის საგარეო საქმეთა სამინისტრო ბოლო პერიოდში რუსი მესაზღვრეების მიერ მოქალაქეების გატაცებას გამოეხმაურა. განცხადებებში მათ ე.წ. საზღვრის "კვეთის" რამდენიმე შემთხვევა ჩამოთვალეს.

რუსული მხარის მტკიცებით, ზაზა გახელაძემ, რომელიც 11 ივლისს რუსმა სამხედროებმა დაჭრეს და გაიტაცეს , ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა.

ქვეყანა, რომელსაც საქართველოს ტერიტორიები 2008 წლის შემდეგ ოკუპირებული აქვს, "პოლიტიკური სპექტაკლის" მოწყობაში თბილისს ადანაშაულებს. თუმცა პრობლემის მოგვარების გზად რუსეთი მხოლოდ საზღვრის დელიმიტაცია/დემარკაციაში ხედავს.

საგარეო უწყება მოუწოდებს საქართველოს, მოლაპარაკებების ფორმატების გამოყენებით პროვოკაციას ბოლო მოუღონ:

"საქართველოს ხელისუფლებისგან ველით ენერგიულ მუშაობას თავის მოსახლეობასთან, რათა საზღვრის უკანონო კვეთა აღარ მოხდეს".

ამასთან, რუსეთის საგარეო საქმეთა სამინისტრო პროვოკაციულს უწოდებს სახელმწიფო დეპარტამენტისა და აშშ-ს საელჩოს განცხადებებს, რომელიც საქართველოს ტერიტორიული მთლიანობისა და სუვერენიტეტის მხარდაჭერას ეხება.

"ცალკე გვინდა გამოვყოთ სახელმწიფო დეპარტამენტისა და აშშ-ს საელჩოს პროვოკაციული კომენტარები, რომელიც უკვე ამერიკელებისთვის ტრადიციულ ქცევად იქცა, სიტუაციაში გარკვევის გარეშე ესარჩლება ქართველებს და მოსკოვსა და ცხინვალს ადანაშაულებს. ეს ყველაფერი ჟენევის დისკუსიებში სულ მცირე ძირს უთხრის ვაშინგტონის, როგორც მიუკერძოებელი მონაწილის პოზიციას", — ნათქვამია რუსეთის უწყების განცხადებაში.

ოკუპანტებმა ზაზა გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებელის, ლია გიგაურის ინფორმაციით, ის ახალგორის საავადმყოფოშია და მის სიცოცხლეს საფრთხე არ ემუქრება.