ქართული ოცნების დეპუტატმა, ზურაბ ხაჩიძემ პრემიერმინისტრს, გიორგი გახარიას ჰკითხა რა გავლენას ახდენს "ნაცმოძრაობის კლასტერის" ფეიკნისუები უცხოელ ინვესტორებზე.

"ჩემი კითხვა შემდეგშია, ბატონო გიორგი, რა გავლენას ახდენს ნაცმოძრაობის კლასტერის ასეთი ფეიკნიუსების ტირაჟირება და მავნებლობა უცხოელი ინვესტორების დამოკიდებულებასა და აქტიურობაზე ჩვენი სახელმწიფოს მიმართ", — თქვა ზურაბ ხაჩიძემ.

დეპუტატმა სიტყვის გამოსვლის დროს აღნიშნა, რომ ნაციონალური მოძრაობის "პარტიული, ქოსატყუილა" ტელევიზიები სიმართლის გაყალბებას ცდილობენ, რითიც მოქალაქეები და უცხოელი პარტნიორები შეცდომაში შეჰყავთ.

25 ივნისს დეპუტატები პარლამენტში აქტიურად საუბრობდნენ ფეიკნიუსზე და მაგალითად მთავარი არხი მოჰყავდათ.

პარლამენტის თავმჯდომარე, არჩილ თალაკვაძე სამწუხაროს უწოდებს იმას, რომ "უპასუხისმგებლო სიუჟეტისთვის" ჟურნალისტს სისხლისსამართლებრივი ან ადმნისტრაციული პასუხისმგებლობა ვერ დაეკისრება. შალვა რამიშვილის გადაცემაში პარლამენტის თავმჯდომარემ მთავარი არხის ეთერში გასული ბავშვთა პორნოგრაფიის საქმეზე გაკეთებული სიუჟეტი განიხილა, რომლის გამოც არხმა მოგვიანებით ბოდიში მოიხადა.