ახალმა რომანტიკულმა კომედიამ მრავალი მაყურებლის დაინტერესება ჯერ კიდევ პრემიერამდე გამოიწვია: სანდენსის კინოფესტივალზე სტრიმინგ სერვისმა Hulu-მ და დისტრიბუტორმა კომპანია Neon-მა ფილმ Palm Springs-ის უფლებები $17.5 მილიონად შეიძინეს, რაც ამ ფესტივალზე მსგავს გარიგებებს შორის რეკორდულად მაღალი ფასია.

თუ რამ გამოიწვია ცნობილი კომპანიების ასეთი მაღალი ინტერესი, ამის შეფასება ჯერჯერობით მხოლოდ სულ ახლახანს გავრცელებული პირველი ტრეილერიდან შეგვიძლია:

ფილმი საერთო ახლობლის ქორწილში მოხვედრილი ნაილსისა და სარას შესახებ მოგვითხრობს, რომლებიც დროის კონკრეტულ მომენტსა და ამასთანავე ერთმანეთს ვერ შორდებიან და მათი ისტორია მუდმივად ხელახლა იწყება.

ფილმში მთავარ როლებს Brooklyn Nine-Nine-ის ვარსკვლავი ენდი სემბერგი და კრისტინ მილიოტი ასრულებენ, რომელსაც აქამდე ისეთ ცნობილ კინო თუ სატელევიზიო პროექტებში მიუღია მონაწილეობა, როგორებიცაა The Wolf of Wall Street, Fargo და Black Mirror.

სანდენსის კინოფესტივალზე ჩვენების შემდეგ Palm Springs-მა კრიტიკოსების დადებითი შეფასებები დაიმსახურა: მაგალითად, Rotten Tomatoes-ზე ამჟამად მისი რეიტინგი 100%-ით დადებითია.

ამ ახალმა კინოსურათმა ბევრს 1993 წელს ბილ მიურეის მონაწილეობით გამოსული კლასიკა Groundhog Day მოაგონა, რის გამოც ნაკლებად ცნობილი რეჟისორის, მაქს ბარბაკოვის ამ პირველ სრულმეტრაჟიან ნამუშევარს ზაფხულის ერთ-ერთ მთავარ ჰიტად მოიაზრებენ.

ფილმის პრემიერა 10 ივლისს შედგება და მაყურებლების დიდ ნაწილსაც მისი შეფასება სწორედ მაშინ შეეძლება.