უკრაინის პრეზიდენტის, ვოლოდიმირ ზელენსკის ცოლს, ელენა ზელენსკაიას კორონავირუსი დაუდგინდა. პრეზიდენტის ოფისის ინფორმაციით, პირველი ლედი თავს კარგად გრძნობს და სიმპტომები არ აქვს.

ამჟამად ელენა ზელენსკაია ამბულატორიულ მკურნალობაზეა და ოჯახის სხვა წევრებისგან იზოლირებულია. გარდა ამისა, პრეზიდენტმა და შვილებმა ტესტირება ჩაიტარეს, თუმცა პასუხი უარყოფითია.

როგორც პრეზიდენტის ადმინისტრაციაში აცხადებენ, სამუშაო შეხვედრებისა და ყოველდღიურ ცხოვრებაში პირველი ლედი კარანტინის წესებსა და რეკომენდაციებს იცავდა, ამასთან რეგულარულად იტარებდა ტესტირებას. ბოლოს მან კორონავირუსზე ტესტი ივნისის დასაწყისში ჩაიტარა და ის უარყოფითი იყო. სად დაინფიცირდა ელენა ზელენსკაია ჯერ უცნობია.

უკრაინაში კორონავირუსის 30 415 შემთხვევაა გამოვლენილი. COVID-19-ის შედეგად 880 ადამიანი გარდაიცვალა.