საქართველოს პრეზიდენტის სალომე ზურაბიშვილის თქმით, პანდემიით გამოწვეულმა კრიზისმა რუსეთს შეიძლება საზღვრებს გარეთ აგრესიისკენ უბიძგოს. ამ თემაზე მან Financial Times–თან ინტერვიუში ისაუბრა. ზურაბიშვილის თქმით, რუსეთში შიდა პრობლემები უფრო მეტად იწვევს საგარეო აგრესიას.

"პანდემიის კრიზისმა, ნავთობის კრიზისმა. . . და პოლიტიკურმა ვითარებამ, შეიძლება ხელი შეუწყოს რუსეთს იყოს უფრო აგრესიული რათა აჩვენოს მიღწევები გარეთ. [...] როგორც საქართველოს პრეზიდენტმა, შემიძლია იმედი გამოვთქვა, რომ ამჯერად ეს ასე არ მოხდება, და შეიძლება კრიზისმა რუსეთის ხელმძღვანელობას აჩვენოს, რომ შეუძლია მათი პრობლემების გადაჭრისთვის განსხვავებულ გზებს მიმართოს", — აღნიშნა სალომე ზურაბიშვილმა.

პრეზიდენტის თქმით, რუსეთმა ახალი რისკები ოკუპირებულ ტერიტორიებზეც შექმნა, სადაც ვირუსის გავრცელების პირობებში მოსკოვი ნაკლებ ღიაობას იჩენს. მისი თქმით, რუსეთი საქართველოს "აბსურდულ" შეზღუდვებს უწესებს ცხინვალის ოკუპირებული ტერიტორიიდან საკუთარი მოქალაქეების დახმარებაზე.

"ჩვენ არ მოგვეცა საშუალება გვერდში დავდგომოდით მათ იმდენად რამდენადაც შეგვეძლო. პირიქით, სეპარატისტული ხელისუფლება უფრო დაიძაბა ურთიერთობებში და სურვილი გაუჩნდა ყველაფრის გაკონტროლების. რუსეთის მხრიდანაც არ გვინახავს რაიმე სახის განვითარება: ჩვენ ვერ ვნახეთ გამჭვირვალობა პანდემიით გამოწვეული მდგომარეობის თვალსაზრისით", — აღნიშნა სალომე ზურაბიშვილმა.

პრეზიდენტის ინტერვიუს Financial Times–თან ადმინისტრაცია ავრცელებს.