აშშ-ის ფედერალურმა სარეზერვო სისტემამ (FED) საპროცენტო განაკვეთები შეამცირა. ამის შესახებ ინფორმაციას დასავლური მედია ავრცელებს. მათივე ცნობით, საპროცენტო განაკვეთი 0-დან 0.25-მდე% განისაზღვრა. აღნიშნული გადაწყვეტილება, ფედერალურმა სარეზერვო სისტემამ საგანგებო სხდომაზე მიიღო.

სესხების განაკვეთის რეკორდულად შემცირებას წინ უძღოდა აშშ-ს პრეზიდენტის, დონალდ ტრამპის განცხადება, სადაც ის ფედერალური სარეზერვო სისტემის ხელმძღვანელს მოუწოდებდა, რომ რაც შეიძლება სწრაფად მიეღო გადაწყვეტილება.

"ფედერალური სარეზერვო სისტემის გადაწყვეტილება ძალიან მახარებს. მინდა მივულოცო მათ, ეს წინ გადადგმული ძალიან დიდი ნაბიჯია და მე ამით ბედნიერი ვარ", — განაცხადა ტრამპმა.

ფედერალურმა სარეზერვო სისტემამ, ასევე გამოაცხადა, რომ 700 მილიარდი დოლარის შესყიდვების დაწყებას აპირებს, რის ფარგლებშიც მომდევნო რამდენიმე თვის მანძილზე მის საკუთრებაში არსებულ სახაზინო ობლიგაციებს სულ მცირე 500 მილიარდი დოლარით გაზრდის, ხოლო იპოთეკით უზრუნველყოფილ ობლიგაციებს კი — 200 მილიარდი დოლარით.

აღნიშნული გადაწყვეტილებით აშშ-ში იმედოვნებენ, 2%-მდე ინფლაციას მიაღწევენ.