ქართული ოცნების დეპუტატი, მამუკა მდინარაძე მათი პარტიის მიერ ლობისტების დაქირავებაზე ამბობს, რომ საჭიროა, " სიმართლე მიიტანონ ყველას ყურამდე". მდინარაძე ოპონენტების კრიტიკას პასუხობს და ამბობ, რომ ნაციონალურ მოძრაობასაც ჰყავს ლობისტები:

"ნაცმოძრაობა, თავისი სატელიტებით გვთავაზობს მოცემულობას რომ მათ უნდა ჰყავდეთ მხოლოდ ლობისტები და ქართულ ოცნებასიმიტომ რომ სიმართლე არავის ყურამდე მივიდეს, არ უნდა ჰყავდეს. მე თუ მკითხავთ დაგვიანებულიც კია, ჩვენი მხრიდან მხოლოდ და მხოლოდ პარტიის მხრიდან. ისინი [ოპოზიცია] საარჩევნო კამპანიას გარეთ ატარებენ და ამ კამპანიაში თუ ჩვენი ლობისტები ჩვენი მეშვეობით ხელს შეუშლიან, ეს მათი პანიკის საფუძველია".

გუშინ, 13 თებერვალს ცნობილი გახდა, რომ პარტია ქართულმა ოცნება ამერიკულ ლობისტურ კომპანია DCI Group AZ, L.L.C.-ს თვეში $33 333-ს გადაუხდის. დოკუმენტში წერია, რომ კომპანიამ პარტია ქართული ოცნება უნდა წარმოაჩინოს, როგორც სანდრო, პრაგმატული, დასავლეთის ლიბერალური იდეალებისა და დემოკრატიის ერთგული პარტნიორი.

მანამდე, აშშ-ის სენატორებისა და კონგრესმენებისგან კრიტიკული წერილების შემდეგ ქართულმა ოცნებამ ლობისტურ კომპანია Hogan Lovells-თან გააფორმა კონტრაქტი. აშშ-ის იუსტიციის დეპარტამენტის ვებ-გვერდზე გამოქვეყნებული ხელშეკრულების მიხედვით, პარტია კომპანიას ერთი წლის განმავლობაში თვეში $75000-ს გადაუხდის.

27 იანვარს, აშშ-ს იუსტიციის დეპარტამენტის გვერდზე გამოქვეყნდა კიდევ ერთი ხელშეკრულება, რომლის მიხედვითაც საქართველოს მთავრობამ საქართველოს მთავრობამ აშშ-სთან ურთიერთობების განმტკიცებისა და კავშირების დამყარებისთვის ლობისტურ კომპანია Chartwell strategy group-თან ხელშეკრულება განაახლა.

როგორც ხელშეკრულებაში ვკითხულობთ, ლობისტური კომპანია საქართველოს მთავრობას დაეხმარება აშშ-ს მხრიდან უსაფრთხოების სფეროს მხარდაჭერის გაძლიერებაში. კომპანია იმუშავებს, აშშ-დან პირდაპირი ინვესტიციებისა და ორმხრივი სავაჭრო ურთიერთობების საკითხებზე. ამასთან, კომპანიის საქმიანობა მოიცავს საერთაშორისო მედიასთან კომუნიკაციასაც.

ამ ლობისტურ კომპანიას საქართველოს მთავრობა, მომსახურებისთვის ანაზღაურების სახით, 2019 წლის ხელშეკრულებით ყოველთვიურად 65 ათას დოლარს უხდიდა.

ბოლო ორი თვეში საქართველოს მთავრობამ აშშ-დან კონგრესმენებისა და სენატორების კრიტიკული წერილები მიიღო. წერილებში იყო გამოთქმული შეშფოთება მიმდინარე მოვლენების, აქციების დაშლის, პროპორციული სისტემის ჩაგდების და ოპოზიციონერი პოლიტიკოსების დევნის გამო და აღნიშნული იყო, რომ საქართველოსა და ამერიკის პარტნიორობა შესაძლოა კითხვის ნიშნის ქვეშ დადგეს.

გაიგეთ მეტი სენატორების წერილზე:

გაიგეთ მეტი კონგრესმენების წერილებზე: