კრწანისის სამხედრო საწვრთნელ ბაზაზე მოკლული გიგა შენგელიას მამამ შემთხვევის ადგილის დათვალიერების შემდეგ ჟურნალისტებთან კომენტარი გააკეთა. მისი განცხადებით, იგი დარწმუნდა, რომ გასროლა შიგნით მოხდა, თუმცა მოგვიანებით გარეთ იპოვეს ცხედარი:

"დავათვალიერე ადგილი სადაც მკვლელობა მოხდა. რაც კითხვები მქონდა იმის პასუხი უკვე მივიღე, კონკრეტულად რა პასუხები ამაზე თავს შევიკავებ, დაველოდოთ გამოძიებას".

ჟურნალისტის კითხვაზე ისევ ადასტურებდა თუ არა იგი, რომ მისი შვილი არაერთხელ შესულა აღნიშნულ ტერიტორიაზე წარსულში, მოკლულის მამამ უპასუხა, რომ ტერიტორიაზე თავად დღეს პირველად იყო და ზუსტი ინფორმაცია არ ჰქონდა:

"ცრუ ინფორმაციებიდან მოდის ეს ყველაფერი. დაცული ტერიტორია კი არის როგორც მე ვნახე. მე რაც მითხრეს, იმას ვამბობდი, თორემ აქ პირველად ვარ".

რომან შენგელიამ ასევე ეჭვქვეშ დააყენე თავისივე ვერსია, რომ შეიძლებოდა მისი შვილი გიგა შენგელია მეგობრის სანახავად მისულიყო ბაზაზე:

"არ ვიცი, ჰყავდა თუ არა აქ მეგობარი, ეყოლებოდა ალბათ. ან რამე უნდა მოეპარათ, ანდა მეგობართან".

კრწანისის ბაზაზე მოკლულის, გიგა შენგელიას მამა, რომან შენგელია კრწანისის ბაზაზე დღეს 26 ოქტომბერს მივიდა, სადაც მისი შვილი მოკლეს. გარდაცვლილის მამა, აღნიშნულ ტერიტორიაზე თავდაცვის სამინისტროს წარმომადგენლებთან ერთად შევიდა.

დღემდე რომან შენგელია მისი შვილის მკვლელობის საქმეზე დაწყებულ გამოძიებას უნდობლობას უცხადებდა და განმარტავდა, რომ მის შვილს ბაზი გარეთ ესროლეს.

ამის შემდეგ თავდაცვის სამინისტრომ გაავრცელა განცხადება, რომ მზად იყო, ოჯახს შემთხვევის ადგილი დაეთვალიერებინა და საქმეში დამოუკიდებელ ექსპერტთა ჯგუფი ჩაერთოს.