შინაგან საქმეთა სამინისტროს ცენტრალური კრიმინალური პოლიციის დეპარტამენტის ნარკოტიკების უკანონო ბრუნვის წინააღმდეგ ბრძოლის მთავარი სამმართველოს თანამშრომლებმა დეკემბერში, ფონიჭალის დასახლებაში ჩატარებული ფართომასშტაბიანი ღონისძიების შედეგად, ნარკორეალიზაციის ბრალდებით 6 პირი დააკავეს. ამის შესახებ დღეს უწყებაში გამართულ ბრიფინგზე ცენტრალური კრიმინალური პოლიციის დეპარტამენტის დირექტორმა მამუკა ჭელიძემ განაცხადა.

მისი განცხადებით, დაკავებულებს ბრალად ნარკოტიკული საშუალების უკანონო შეძენა-შენახვა და გასაღება ედებათ. აღნიშნული დანაშაული 8-დან 20 წლამდე ან უვადო თავისუფლების აღკვეთას ითვალისწინებს.

როგორც უწყებაში აცხადებენ, სამართალდამცველებმა, მოსამართლის განჩინების საფუძველზე, ბრალდებულებისგან ნარკოტიკული საშუალებების რამდენჯერმე კონტროლის მიზნით შეიძინეს და აღნიშნული შესყიდვები ფარულად ჩაიწერეს. პოლიციამ, დაკავებულების პირადი და საცხოვრებელი სახლების ჩხრეკისას, ნივმტკიცება 68 შეკვრა ჰეროინი, სხვადასხვა სახის ნარკოტიკი და თანხა ამოიღო.

ასევე, ერთ-ერთ დაკავებულს ბრალი ედება ცეცხლსასროლი იარაღის მართლსაწინააღმდეგო შეძენა-შენახვაშიც. პოლიციამ, მისი საცხოვრებელი სახლის ჩხრეკისას, ცეცხლსასროლი იარაღი, მჭიდი და 23 საბრძოლო ვაზნა ამოიღო.

გამოძიება საქართველოს სისხლის სამართლის კოდექსის 260-ე, 261-ე, 273-ე და 236-ე მუხლებით მიმდინარეობს, რაც განსაკუთრებით დიდი ოდენობით ნარკოტიკული საშუალების უკანონო გასაღებას, მარიხუანის უკანონო შეძენა-შენახვას, ასევე, ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვას გულისხმობს.

2019 წლის პირველი იანვრიდან დღემდე, შსს-ს თანამშრომლების მიერ ჩატარებული ოპერატიულ-საგამოძიებო ღონისძიებების შედეგად ამოღებულია: 31000 აბი სუბუტექსი და სუბოქსინი, 32 კილოგრამი ჰეროინი, 2 კილოგრამი და 200 გრამი კოკაინი, 22 კილოგრამი და 10 ლიტრი ნარკოტიკული საშუალება ალფა პვპ, 25 კილოგრამი მდმა, 10 კილო და 500 გრამი ახალი ფსიქოაქტიური ნივთიერება და 2 კილოგრამამდე ფსიქოტროპული პრეპარატები.