იუსტიციის მინისტრმა, თეა წულუკიანმა ოპოზიციას მრავალმანდატიან ოლქებთან დაკავშირებით შეთავაზება დაუწუნა. ესაა უმრავლესობის პოზიციაც, რომელიც მედიასთან იუსტიციის მინისტრმა გააჟღერა.

ოპოზიციას სურდა ოლქების გამსხვილება, უმრავლესობა კი "ნაკლები ყურადღების მიქცევის" არგუმენტით შეთავაზებას უარყოფს.

"აღმოჩნდა, რომ ის მოდელი, რომელზეც იყო საუბარი, არის მხოლოდ ავღანეთში, არის მხოლოდ ერაყში და ალბათ, იმ ქვეყნებში ეს მოდელი, რა თქმა უნდა, შეძლებისდაგვარად მუშაობს, მაგრამ ეს მოდელი ჩვენი ქვეყნისთვის მისაღები ვერ იქნება... ჩვენ ვთვლით, რომ ეს წარმომადგენლობითობის პრინციპი არ ვარგა ჩვენი ქვეყნისთვის", — თქვა წულუკიანმა.

ეს ოპოზიციისა და ხელისუფლების წარმომადგენლებს შორის საერთაშორისო ორგანიზაციების ჩართულობით რიგით მესამე შეხვედრაა. იმის მიუხედავად, რომ ხელისუფლება ოპოზიციის შეთავაზებებს არ თანხმდება, მუდმივად ირწმუნება, რომ მზად არიან მოლაპარაკებებისთვის.

ნოემბერის მოვლენები მოკლედ

მას შემდეგ, რაც ბიძინა ივანიშვილის დაპირება არ შესრულდა და 2020 წლის არჩევნების პროპორციულ სისტემაზე გადასვლის კანონპროექტი მმართველმა პარტიამ ჩააგდო, თბილისში რამდენიმეათასიანი აქცია დაიწყო. აქციები მალევე პარლამენტის პიკეტირებასა და "დაბოქლომების" აქციაში გადაიზარდა. პარლამენტთან პიკეტი შინაგან საქმეთა სამინისტრომ წყლის ჭავლით ორჯერ დაშალა.

პროპორციული სისტემის კანონპროექტის ჩაგდების შემდეგ ე.წ გერმანულ მოდელზე გადასვლის იდეა სამოქალაქო სექტორმა გააჟღერა, რასაც ოპოზიციამაც დაუჭირა მხარი. ვინაიდან კანონპროექტის ჩაგდების მიზეზად მაჟორიტარი დეპუტატების უკმაყოფილება დასახელდა, პროტესტის მონაწილეებმა განაცხადეს, რომ ეს მოდელი მათ პარლამენტში მოხვედრასაც ითვალისწინებდა.

მმართველი გუნდი შეთავაზებას არ დათანხმდა, მათი მტკიცებით ეს მოდელი არაკონსტიტუციურია. ქართული ოცნების გენერალური მდივანი კახა კალაძე აცხადებდა, რომ თემა დახურულია და ისინი სხვა ფორმატზე აღარ იმსჯელებენ.

ოფიციალური ინფორმაციით, ამ დრომდე ამ საკითხზე მმართველ პარტიასა და ოპოზიციურ პარტიებს შორის მოლაპარაკება მხოლოდ სამჯერ გაიმართა. ისიც უშედეგოდ.