მოძრაობა 20/30-იანელებმა, რომლებიც ბიძინა ივანიშვილის მთაწმინდაზე დაკრძალვას მოითხოვენ, შსს-სთან "სამადლობელი" პერფორმანსი გამართეს, რომელიც სამოქალაქო აქტივისტების "კონტრაქციაც" იყო. მოძრაობის წევრები აცხადებდნენ, რომ "ერის მამის დაცვა საამაყოა" და პოლიციას მადლობას უხდიდნენ ბიძინა ივანიშვილის მსახურებისთვის.

პარალელურად კი შსს-სთან გაიმართა მოძრაობა #სირცხვილიას და შეცვალეს საპროტესტო აქცია. ისინი მოუწოდებდნენ შინაგან საქმეთა სამინისტროს, რომ დაიცვას ადამიანის უფლებები და უკანონო ბრძანებების გამო არ მისცეს მოძალადეებს მათზე თავდასხმის უფლება. აქტივისტები აპროტესტებდნენ ქართული ოცნების ოფისთან მომხდარ მოვლენებს, როდესაც სამართალდამცავებმა არ დააკავეს პირები, რომლებიც არამხოლოდ აქტივისტებს, არამედ პოლიციელებსაც აყენებდნენ შეურაცხყოფას.

რაც შეეხება მოძრაობა 20/30-იანელებს, მასში გაერთიანებული არიან აქტივისტები, რომლებიც პროტესტს იუმორისტული ფორმებით გამოხატავენ. მათ ხელმოწერებიც კი შეაგროვეს ბიძინა ივანიშვილის მთაწმინდაზე დაკრძალვის მოთხოვნით, ოღონდ "100 წლის შემდეგ". გარდა ამისა, გამართეს საპროტესო აქცია დიმიტრი ხუნდაძის ოფისთან, სადაც აცხადებდნენ, რომ დეპუტატს "უდიდესი ქველმოქმედის, ბიძინა ივანიშვილის ღალატს არავინ აპატიებდა".

ბოლო დღეების მოვლენები

საპროტესტო აქცია-პერფორმანსები თბილისში მას შემდეგ დაიწყო, რაც მმართველმა გუდნმა პროპორციული საარჩევნო სისტემის კანონპროექტი ჩააგდო. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ სრულად ოპოზიციურმა სპექტრმა და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ.