თბილისის მერის, კახა კალაძის თქმით, ჭავჭავაძის გამზირის რეაბილიტაციის მესამე ეტაპი გაგრძელდება, რადგან, მისივე ცნობით, "მოსახლეობის ძალიან დიდი ნაწილი" ამის მომხრეა. ამის შესახებ მერმა დღეს, 25 სექტემბრის მთავრობის სხდომაზე განაცხადა. მესამე ეტაპი თაქთაქიშვილის ქუჩიდან ვაკის პარკამდე არსებული მონაკვეთის რეაბილიტაციას გულისხმობს.

"ფეისბუქით გამოკითხულთა 90% ამბობს, რომ სამუშაოები აუცილებლად უნდა გაგრძელდეს. გარდა ამისა, ვაკის რაიონის გამგებლის, ნოდარ ტურძელაძის ხელმძღვანელობით, აზრი ადგილობრივ მოსახლეობასაც ვკითხეთ.

მოსახლეობის ძალიან დიდი ნაწილი ამ სამუშაოების გაგრძელების მომხრეა. ჩვენს გუნდში იყო აზრთა სხვადასხვაობა, რომ ხომ არ შეგვეჩერებინა და გაზაფხულზე დაგვეწყო სამუშაოები. ვფიქრობ, რომ სწორია სამუშაოების გაგრძელება და მოსახლეობას ვეთანხმები", — განაცხადა კახა კალაძემ.

კახა კალაძის ოფიციალურ ფეისბუქგვერდზე გამოიკითხვა 18 სექტემბერს დაიწყო და მოიცავდა კითხვას:

"როგორ ფიქრობთ, უნდა გააგრძელოს თუ არა მიმდინარე წელს თბილისის მერიამ ჭავჭავაძის გამზირის რეაბილიტაციის მესამე ეტაპი?"

თბილისის მერის განცხადებით, ჭავჭავაძის გამზირზე, პიქსელის შენობიდან არაყიშვილის ქუჩამდე, ქვედა ფენებში გზის მოწყობის სამუშაოები 15 ოქტომბრისთვის დასრულდება.

მისივე თქმით, გზის აღნიშნულ მონაკვეთში ამ დროისთვის, სანიაღვრე ქსელის მოწყობა მიმდინარეობს.