პრემიერ-მინისტრის, მამუკა ბახტაძის დაპირებით, სტატუსის მქონე სკოლის მასწავლებლების ხელფასები 2019 წლის ოქტომბრიდან ყოველწლიურად გაიზრდება. მან აღნიშნა, რომ 2022 წელს უფროსი მასწავლებლის ხელფასი 1 700 ლარი, წამყვანი მასწავლებლის 2 150, ხოლო მენტორი მასწავლებლებისთვის 2 450 ლარი იქნება.

"შრომის ანაზღაურება იყო ერთ-ერთი ყველაზე მტკივნეული საკითხი. უფრო მეტიც, ეს ემოციურადაც პირადად ჩემთვის იყო უმძიმესი ტვირთი, როდესაც მარტივ ციფრებში ვხედავდი, რომ საქართველოში მასწავლებლის ხელფასი საშუალო ხელფასს ორჯერ ჩამორჩებოდა. ბუნებრივია, ასეთი პოლიტიკით და მიდგომებით 21-ე საუკუნეში ქვეყანას წარმატება ვერ ექნებოდა, ამიტომ ჩვენ გვჭირდება რადიკალური ცვლილებები და მინდა გითხრათ, რომ მე ვგრძნობ ამ დაკვეთას ჩვენი საზოგადოებისგან", — განაცხადა მამუკა ბახტაძემ.

მამუკა ბახტაძემ, ასევე, აღნიშნა, რომ პედაგოგების გარდა, ხელფასები ეზრდებათ რესურსცენტრების თანამშრომლებს და სკოლების ტექნიკურ პერსონალს, სკოლის ექიმებს და ინკლუზიური განათლების მხარდამჭერ სპეციალისტებსაც. ხელფასის ზრდა, ასევე, შეეხებათ მანდატურის სამსახურის მიერ გადამზადებულ სკოლის უსაფრთხოებაზე პასუხისმგებელ პირებსაც.